Analisti Andi Bushati u shpreh se drejtësia në vend po shkon në dy drejtime: ose e imponuar nga SHBA, ose e ndërtuar nga sharlatanë pa legjitimitet.
Ai e lidhi këtë situatë me përvojën në Kosovë, duke përmendur prokurorin Jack Smith dhe debatet që kanë pasuar në atë kontekst.
Bushati vuri në dukje se SPAK ka humbur besimin publik dhe është shndërruar në një mekanizëm që godet opozitën. Ai kritikoi dhënien e dekoratave për figura të tilla si Dumani, duke e cilësuar këtë një lojë politike dhe një qokë të fundmandatit.
Në analizën e tij, ai vuri theksin tek ndikimi i ndërkombëtarëve, të cilët, sipas tij, kanë ndikuar për të krijuar një regjim të padrejtë. Bushati deklaroi se SPAK, pavarësisht dekoratave apo mbështetjes, mbetet një institucion pa legjitimitet për qytetarët.
“Këtu ose bëjnë drejtësi amerikanët, ose bëjnë sharlatanët. Nëse do ta bënin drejtësi amerikanët, Dvorani do të ishte ende aty. Por, mesa duket, drejtësinë këtu po e bëjnë sharlatanët, që nuk kanë lidhje me njeriun e shpallur si hero të drejtësisë nga amerikanët.
Lidhur me debatin që po bëjmë, ka pasur një debat të tillë edhe në Kosovë. Madje, sot e lexova në mediat e Batonit për këtë Jack Smith.
Tani shiko: kur ky futi drejtuesit e UÇK-së në burg, një pjesë e madhe i shpallën ata heronj. Heroi i madh ai, prokuror model i Gjykatës Speciale, i dërguari i Amerikës që po fut luftëtarët në burg. Por del Trump sot dhe thotë se ai është një vrasës, një terrorist që mund t’i çojë njerëzit në litar.
Tani, këto janë dy Amerikat. Pra, të thuash që Amerika është një, e përjetshme dhe fjalë e Zotit, është pak si të jesh budalla. Unë më shumë e shoh këtë si një “qokë” fundmandati, një gjë e lobuar.
Dumanit t’i bëhet qejfi, ta marrë dhe një dekoratë në fund të vitit. Problemi është çfarë do të bëhet në Shqipëri.
Por të gjithë ata që e përdorën këtë administratë për të krijuar një regjim këtu, i dhanë dhe Dumanit një dekoratë që nuk besoj se do t’i bëjë as mirë, as keq. Kjo është më shumë për të na hedhur hi syve.
Për Dumanin, mund të kenë lobuar ata që i “gjuajtën me çizme” Këshillit të Lartë të Prokurorisë dhe thanë “këtë do të vëmë” duke shantazhuar një nga një njerëzit që do ta vendosnin atë. Ambasadorja amerikane e kohës ishte pjesë e kësaj.
Tani, çfarë po ndodh? Nga çfarë kemi parë atëherë, SPAK ka humbur legjitimitetin mbi të cilin u ngrit shpresa për të. Të paktën, këtë nuk po e them nga këta lobistët e Edi Ramës, por nga tre deklarata të të gjithë aleatëve të PD-së, nga Amerika deri në Evropë, që thonë se Shqipëria është shndërruar në një burg politik për opozitën.
Pra, kjo fabul e SPAK-ut sa vjen e rrënohet.
Ata që morën paratë e taksapaguesve të tyre për të thënë “ne do të bëjmë një histori suksesi,” kanë nevojë për këtë dekoratë. Po mbyllin mandatin dhe duan ta përfundojnë si një histori suksesi.
Një histori suksesi që nuk e lanë të përsëritet as në Maqedoni, as në Kosovë, sepse u thanë: “Mos bëni gabim të bëni marrëzinë e Shqipërisë, se do ta çoni vendin në katastrofë.”
Edhe me dekoratë, edhe pa dekoratë, SPAK do të jetë ky që ishte dje dhe do të jetë nesër.
Ata që kanë thënë “Dumani është heroi i fëmijëve tuaj,” tani po i japin dhe dekoratën.
Unë nuk e pranoj as si hero të drejtësisë sime, as si një njeri që e dekorojnë ata që duan ta dekorojnë“, tha Bushati per Syri tv.
