Zgjedhjet parlamentare në pranverën e ardhshme do të mbahen në datën 11 Maj të vitit 2025. Kjo është datë që ka dekretuar Presidenti i Republikës, Bajram Begaj.
Kreu i shtetit zhvilloi takime në Presidencë me të gjithë aktorët politikë, por u refuzua nga opozita, duke i konsideruar si farsë ato konsultime, pasi sipas saj, Begaj e kishte caktuar datën e zgjedhjeve me urdhër nga kryeministri Edi Rama.
Nga konsultimet me Begajn, Partia Socialiste e cila përfaqësohej nga Sekretari i Përgjithshëm, Blendi Klosi propozoi 11 Majin si datë të zgjedhjeve. Po ashtu e njëjta datë u propozua edhe nga Komisioneri Shtetëror i Zgjedhjeve, Ilirjan Celibashi, i cili po ashtu konsiderohet si një “vegël” e Qeverisë.
Ndërsa partitë e vogla, pas takimit që patën me Presidentin Bajram Begaj, propozuan 4 Majin, si datë për të zhvilluar zgjedhjet. E duket se koha i dha të drejtë Partisë Demokratike, pasi Begaj dekretoi të njëjtën datë të propozuar nga Qeveria.
Por, jo vetëm kaq! Gjatë seancës që u mbajt të martën në Kuvend, zv.kryeministrja Belinda Balluku iu drejtua opozitës se kanë kohë deri më 11 Maj, duke e caktuar vetë ajo datën e zgjedhjeve, pa pritur dekretin e Begajt.
“Keni kohë deri më 11 Maj të vazhdoni me narrativën tuaj anti-shqiptare, të gënjeni në këtë foltore.” – deklaroi Balluku në Kuvend, duke vetëdemaskuar përdorjen e Presidentit të Republikës Bajram Begaj, si një noter i dëshirave të Partisë Socialiste.
Në njoftimin e shpërndarë për mediat, Presidenca justifikohet se përzgjedhja e datës 11 Maj erdhi për shkak se u kërkua nga KQZ për të pasur më shumë kohë në dispozicion për zbatimin e votën e diasporës.
“Shkaku themelor për caktimin e datës 11 maj 2025 si datë për mbajtjen e këtyre zgjedhjeve qëndron në nevojën e shprehur nga KQZ-ja për të shfrytëzuar të gjithë kohën në dispozicion për përgatitjen e infrastrukturës ligjore dhe organizative, me qëllim që të bëhet i mundur votimi i sukseshëm dhe rezultativ i shqiptarëve nga jashtë vendit,” thuhet në njoftimin e shpërndarë nga Presidenca.
Sa i përket shqetësimit të Partisë Demokratike dhe pjesës tjetër të opozitës se data 11 mund të ndikojë pozitivisht për Partinë Socialiste për shkak se parashikohet që të zhvillohet samiti i 6-të i Komitetit Politik Evropian, Presidenca pranon se ky aktivitet mund të përbëjë ndërhyrje në fushatën zgjedhore.
“Pa vënë në diskutim lejueshmërinë ose jo të një veprimtarie të tillë, sepse kjo është kompetencë ligjore e KQZ-së, Presidenti i Republikës bashkohet në qëndrimin, se zhvillimi nga ana e qeverisë i një takimi të kësaj natyre në finalen e fushatës zgjedhore, me pjesëmarrjen e jashtëzakonshme të lidershipit politik evropian, nuk mund të jetë pa ndikim në caktimin e datës së zgjedhjeve,” thuhet në njoftim.
Por Presidenca sqaron se ka kërkuar informacion për këtë çështje dhe ka kryer të gjitha verifikimet me autoritetet kompetente të Shqipërisë dhe ka marrë zyrtarisht përgjigje se ky samit do të zhvillohet pas datës 11 maj 2025.
“Konfirmimi zyrtar si më sipër heq rezervën e shprehur nga Partia Demokratike dhe nga pjesa tjetër e partive parlamentare ndaj datës 11 maj 2025 dhe e bën këtë datë të pranueshme dhe të pëlqyeshme për të gjithë faktorin politik,” sqaroi më tej Presidenca.
