Kreu i PD-së, Sali Berisha, i ftuar në emisionin “Open” ka deklaruar se u shpall “non grata” për dëshmitë e ish-kryedemokratit Lulzim Basha në Departamentin e Shtetit dhe ambasadën amerikane në Tiranë, duke e paraqitur veten si “kukull” e tij.
“Por kjo nuk ishte e vërtetë, unë kisha një qëndrim: nuk ndërhyrja në asnjë rast, nëse nuk më pyesnin. Basha e kishte paraqitur veten kukull time. Basha ishte nga ata persona që kishte deklaruar në Departamentin e Shtetit dhe Ambasadë se Sali Berisha është personi që më ka diktuar të gjitha vendimet e gabuara. Dhe kjo ata i bënte, e përdornin si pretekst për të justifikuar goditjen e një njeriu… Për reformën në drejtësi kam qenë i këtij mendimi që ne të bëjmë draftin tonë dhe ta dërgojmë në Komisionin e Venecias.”, tha Berisha, duke shtuar se vendimi u diktua nga George Soros.
Më tej Berisha foli për takimet që ai bënte me ish-ambasadorin amerikan Donald Lu. Teksa tregoi arsyet e takimeve, Berisha zbuloi se në një nga takimet Donald Lu e falënderoi atë, pasi Berisha i argumentoi se pse në Shqipëri nuk duhet të aplikohej “FBI shqiptare”, që e propozoi aso kohe kryeministri Rama.
“Donald Lu vinte te unë, se fillimisht Rama dha idenë e FBI shqiptare që do varej nga kryeministri, dhe Donald Lu kishte 6 muaj që kishte ardh dhe meqënë se më kishte ardh në zyrë për një vizitë, unë shkova në zyrën e tij për një vizitë kortezie. Në këtë vizitë hapet ky problem, dhe unë i them që ky model nuk mund të jetë në Shqipëri sepse nuk mund të jetë Shqipëri republikë presidenciale dhe ai më falenderoi, më tha Sali më ke bindur me këtë”, tha Berisha.
Gjithashtu, edhe masën e arrestit ndaj tij, Sali Berisha e ka konsideruar si një vepër të kryeministrit Edi Rama dhe ambasadës amerikane në Tiranë.
“Ata që vinin ishin idealistët. Në fillim erdhi Ambasada e SHBA e cila monitoronte atë tubimin e idealistëve, pastaj ishin ata të Qeverisë që fotografonin, që ushtronin presione, por në fund fitoi rruga e Shpresës. Masa e arrestit tim ishte vepër e përbashkët e diplomatëve të Ambasadës së SHBA në Tiranë dhe Edi Ramës”, tha Berisha.
Ndërsa i konsideroi si veprime ultra-mafioze në atë që e cilësoi si grusht shteti, Berisha tha se diplomatët amerikanë bënë një grush shteti brenda shtetit për ti dhënë të gjitha pushtetet Edi Ramës.
