Grupi parlamentar i Partisë Demokratike ka vendosur në mbledhjen e kësaj të mërkure që të kërkojnë ngritjen e një komisioni hetimor parlamentar për Portin e Durrësit.
Ky vendim është marrë pas publikimit të disa artikujve të mediave gjermane, të cilat hedhin dyshime për afera korrupstive si për projektin e ri që pritet të ndërtohet ashtu edhe për largimin e një kompanie gjermane.
Kreu i grupit parlamentar të PD-së, Gazment Bardhi, përmes një postimi në rrjetet sociale, e konsideron këtë projekt si një ndër aferat më të mëdha të Edi Ramës dhe Belinda Ballukut.
Ai shton më tej se investigimet serioze të mediave gjermane kanë zbuluar gjurmë që shkojnë deri në Ekuador dhe Kolumbi. Bardhi i bën thirrje SPAK që të sa më parë dhe pa asnjë hezitim të hetojë dhe verifikojë të gjitha investigimet e kryera mbi këtë aferë skandaloze korruptive dhe sipas tij, dyshohet se ka fije të lidhura me krimin e organizuar ndërshtetëror.
Postimi i plotë i Gazment Bardhit:
“Afera e Portit të Durrësit që sipas investigimeve serioze të mediave gjermane ka gjurmë që shkojnë deri në Ekuador dhe Kolumbi, është një nga aferat më të mëdha të Edi Ramës dhe Belinda Ballukut, që duhet të hetohet me seriozitet dhe pa asnjë vonesë. Për këtë qëllim, në mbledhjen e sotme të Grupit Parlamentar të Partisë Demokratike u vendos që mbi këtë aferë të kërkohet një hetim i plotë parlamentar.
Transparenca mbi pasuritë publike dhe veçanërisht verifikimi dhe prerja e lidhjeve të krimit të organizuar me projekte madhore strategjike të vendit, duhet të jetë misioni i Kuvendit në periudhën e mbetur të kësaj Legjislature.
Grupi Parlamentar i PD nxit Prokurorinë e Posaçme që sa më parë dhe pa asnjë hezitim të hetojë dhe verifikojë të gjitha investigimet e kryera mbi këtë aferë skandaloze korruptive dhe që dyshohet se ka fije të lidhura me krimin e organizuar ndërshtetëror.”
Porti Durrës/ Media gjermane: Dyshime mbi Ballukun, çfarë fshihet pas “fasadës” kroate
Koncesioni i Portit Durrës/ Media gjermane-Ramës: Po monitorohesh nga BE e Berlini
“Afera” e koncesionit në Portin e Durrësit/ Pse u shqetësua Balluku nga media gjermane
