Kryedemokrati Sali Berisha e ka cilësuar si një nga aferat më të mëdha korruptive në historinë e Shqipërisë, atë të Portit të Durrësit.
Gjatë fjalës së tij në mbledhjen e Grupit Parlamentar të PD, Berisha cilësoi këtë aferë si një ndëshkim të madh për qytetarët shqiptarë, duke e krahasuar me dëmimin që regjimi i Enver Hoxhës u ka shkaktuar popullit me ndërtimin e bunkerëve.
Berisha theksoi se ky veprim i fundit është më i rëndë dhe më shkatërrues, duke shpërfaqur dëmimin e potencialit ekonomik të vendit. Ai e kritikoi ashpër qeverinë e Edi Ramës, e cila, sipas tij, ka sjellë një skemë që i ngarkon shqiptarët me një kostos të madhe për ndërtimin e portit të ri, një projekt që përfshin dhe zhvillimin e një marine luksoze në Durrës. Kryedemokrati theksoi se ky projekt, i lidhur me interesat e grupeve private, do të përfshinte investime shumë të mëdha për ndërtimin e 12,500 apartamenteve dhe 6 hoteleve.
FJALA E BERISHËS:
Të nderuar, nga të gjitha aferat korruptive, nga viti 1990 gjer sot, afera më e madhe korruptive në historinë e këtij vendi është Porti i Durrësit.
Në raport me qytetarin, ky është ndëshkimi më i madh për qytetarët shqiptarë pas ndëshkimit që u ka bërë Enver Hoxha me bunkerët shqiptarëve.
Ai, për shumë vite, 30 përqind të buxhetit e futi në bunker, por dhe sado që përpiqen, po në qoftë se e konverton me dollarin e sotëm atë shpenzim, ai mund të jetë 5, 8 miliardë dollarë të groposura, të varrosura nga një paranojak në një kohë kur shqiptarët përjetonin urinë e zgjatur.
Por pas bunkerëve, nuk ka vjedhje më të tmerrshme, më të madhe se vjedhja me Portin e Durrësit.
Ne e kemi denoncuar, jemi përpjekur me të gjitha çfarë kemi pasur në dorë ne, e kemi dorëzuar edhe në prokurori dhe kudo, në Gjykatë Kushtetuese, por kjo nuk ka të ndalur.
Ky është një krim që nuk i është bërë ndonjëherë këtij vendi.
Porti i Durrësit, i cili pa asnjë lloj vështirësie arrinte kapacitetin 4 milion ton dhe, ne lamë një tender të gatshëm për thellimin e tij gjer në ankorimin e anijeve 50 mijë tonëshe nga një kompani e fuqishme gjermane.
Porti i Durrësit është porti më natyral i Shqipërisë.
Pse? Se është në distancën më të shkurtër për të gjithë mesin e Shqipërisë, që është shumica e popullatës, siç është Porti i Vlorës porti më natyral për jugun.
Por kjo është çmim, është kosto, kjo ka ndikim direkt në çmimin e çdo gjëje që importohet.
Tani çfarë thoshte Edi Rama? Thoshte që këtë portin e ri, shqiptarët nuk do harxhojnë një qindarkë, do e ndërtojë privati.
Tani na del se shqiptarët do harxhojnë 1.3 miliardë euro për ndërtimin e portit të ri.
Përveç faktit se trojet tokësore dhe ujore, se ndërtohet Jaht Marina Durrës, trojet tokësore dhe ujore të portit shkojnë së paku 3 miliardë euro, ku sheiku Al Alabar, që investon gjithsej 70 milionë, me Edi Rama dhe botën e nëndheshme do të ndërtojnë 12.500 apartamente dhe 6 hotele superluksoze.
