Një dite pasi pranoi pjesërisht kërkesën e kryedemokratit Sali Berisha, Gjykata Kushtetuese ka reaguar sërish për seancën e ditës së djeshme.
Përmes një njoftimi për mediat, Kushtetuesja sqaron se, kjo gjykatë një ditë më parë ka shqyrtuar vetëm masën e parë të sigurisë, atë të ‘detyrim paraqitje’ dhe ‘ndalim i daljes jashtë vendit’.
Ndërsa, në lidhje me masën “arrest shtëpie”, ka një tjetër ankimim ku do të mbahet një seancë tjetër gjyqësore.
Njoftimi i Gjykatës Kushtetuese:
Duke marrë shkas nga lajmet dhe opinionet në media dhe portale, në lidhje me vendimarrjen e djeshme të Gjykatës Kushtetuese, sqarojmë se vendimi i referohet masave të sigurisë “detyrim paraqitje” dhe “ndalim i daljes jashtë vendit”, dhe jo shqyrtimit të masës “arrest në shtëpi”.
Sikurse u deklarua dhe në Konferencën për shtyp të Kryetares Zaçaj, ju sqaroj se për sa i takon vlerësimit të masës së sigurisë “arrest në shtëpi”, kërkesa në lidhje me këtë masë është regjistruar në Gjykatë, në datën 18.11.2024, dhe do të jetë objekti një shqyrtimi tjetër gjyqësor sipas afateve dhe rregullave të parashikuara në ligj.
