27-vjeçari Klaudio Prendi u ekzekutua në një atentat mafioz pak pas mesnatës së 18 nëntorit në rrugën “Xhanfize Keko” në kryeqytet, teksa sapo kishte dalë në ambientet e një lokali dhe hipi në makinën e tij tip “G Class”.
Viktima është djali i ish gjyqtarit të Gjykatës së Krimeve të Rënda, Fran Prendi, i cili është shkarkuar nga procesi i vettingut.
Ndërkohë, edhe kryeministri Edi Rama ka folur për viktimën dhe jo më larg sesa gjatë fushatë elektorale për zgjedhjet lokale të vitit 2023.
Në videon që po qarkullon në rrjetet sociale, Rama gjatë fjalës së tij para pukjanëve thotë se djali i një ish-gjyqtari të larguar nga vetingu kërcënonte me armë qytetarët, që siç duket i referohej pikërisht 27-vjeçarit Klaudio Prendi.
“Po atë bandit, djalin e gjykatësit të larguar nga vettingu për korrupsion, që vjen këtu dhe nxjerr armë në Pukë. Çfarë e kanë atë, ndërtuesin e ardhshëm të pallateve apo e kanë sjellë këtu për drejtor të zvillim-planifikim virtual të Pukës”, – ka deklaruar Rama në vitin 2023.
Kujtojmë se kandidati i koalicionit opozitar “Bashkë Fitojmë” Rrok Dodaj fitoi bashkinë e Pukës në zgjedhjet e 14 majit të vitit 2023, me 58.13 % të votave, kundrejt kandidatit socialist Gjon Gjonaj me 41.87 %.
