Ashtu siç kishte paralajmëruar, Partia Demokratike zhvilloi pasditen e sotme për rreth 1 orë e gjysmë një protestë përpara parlamentit të Shqipërisë kundër miratimit të projekt-buxhetit të vitit 2025.
Opozita është kundër miratimit të projekt-buxhetit, duke e konsideruar atë “antisocial”.
Përfaqësuesit e opozitës mbajtën fjalime ku shprehën pakënaqësitë e tyre në lidhje me buxhetin, duke theksuar rëndësinë e vendosjes së një minimumi jetik prej 200 eurosh.
Nënkryetari i PD-së dhe aktualisht drejtues politik i qarkut të Shkodrës, Luçiano Boçi, tha se pensionistët duan që jeta e tyre të mos jetë një kalvar vuajtjes, siç ka qenë deri tani. Më tej ai u shpreh se një pjesë e pensionistëve mezi presin fundin e tyre që të shpëtojnë nga vështirësitë që kanë në jetë.
“Sot është një tubim ku janë thirrur pensionistët që të shprehin zemërimin dhe revoltën e tyre për mënyrën si i ka trajtuar qeveria përgjatë këtyre viteve dhe se si vepron sot me hallet, problemet me jetët e tyre.
Ata duan që jeta e tyre të mos jetë një kalvar vuajtjesh që siç ka qenë deri tani , duan qetësi, duan siguri dhe këtë gjë kjo qeverisje ua ka marrë dhe madje nuk ua jep në masën që e meritojnë dhe që u duhet që të përballojnë jetën.
Mirë që i ka marrë fëmijët këtyre pensionistëve dhe i ka degdisur jashtë Shqipërisë, por u merr çdo ditë të ardhurat, i vendos në vështirësi.
Një pjesë e tyre duket sikur e presin atë fundin mezor që t’i vijë sepse duan që të heqin dorë nga vuajtje që i shkakton kjo qeverisje.
Jam i bindur se këta pensionistë që janë keqpërdorur në këto vite do japin reagimin e tyre në zgjedhje. Ata janë ata që votojnë, jo me tifo zëri politike, por duke parë vështirësitë jetës në familjet dhe fëmijët e tyre.”- tha Boçi.
Në tubim kanë qenë të pranishëm shumë pensionistë, duke kërkuar që pensionet të rriten me 20%. Ata kërcënuan se do të largohen në Kosovë, pasi atje pensionet janë më të larta se në Shqipëri.
“Kemi ardhur për t’u drejtuar në drejtim të parlamentit sepse ai është parlamenti që kemi ndërtuar ne. Kemi kontribuar ne dhe jo Spiropali që të na drejtojë Kuvendi.
Të hyjmë në parlament dhe të verifikojmë punën e kryer tonën. Nuk i lejojmë këta sharlatanë të nëpërkëmbin pensionistët.
Si tha kryeministri, mbeturina protestues. Po ai nuk është kryeministër, është hale. Prandaj i bëj thirrje që ne pensionistët, edhe në kohë të vështirë me shi, të bëhemi të fortë dhe ta shporrim këtë sa ma shpejt. Ilaçi më i fortë është ta largojmë menjëherë këtë kryeministër sepse është Shqipëria që kemi ndërtuar ne.
Ka mobilizuar 1500 forca kundër nesh, pensionistëve. Edhe serbi në vitin 1999 nuk ka mobilizuar kaq shumë forca kundër kosovarëve. Turp e faqja e zezë për këtë kryeministër që mashtron me 100 euro apo 150 euro.
Ose na jep pensionin që meritojmë, ose përndryshe do shkojmë në Kosovë tek Albini jonë se ai ka pensionet më të larta,” tha një pensionist.
Protesta u zhvillua nën kushte të këqija të motit.
Pas fjalimeve të qytetarëve dhe pensionistëve, tubimi u mbyll.
