Gugash Magani e nisi me fitore aventurën e tij të dytë me Tiranën duke mundur thellë 4-0 Bylisin.
Një rezultat që solli disi qetësinë në klub, pasi në 12 javët e para bardheblutë kishin marrë vetëm 1 fitore.
Magani nuk është se në skuadër ndryshoi ndonjë gjë të madhe. Thjesht, Përgjonin e ktheu në fushë pas dëmtimit, Isufin e aktivizoi në pozicionin e tij, ashtu siç bëri me Gjumsin, ndërsa uli në stol Abahun, një nga më të dobëtit në fushë gjatë pjesës së parë të kampionatit.
Të gjithë mund të thonë se skuadra ka ndryshuar, por ky do të ishte naiviteti më i madh. Edhe trajneri i Tiranës, e di. E tha para mediave se Bylisi nuk tregon asgjë, dhe se tani fillon malorja për skuadrën dhe vetë Maganin.
Testet më imediate të teknikut peqinas janë Elbasani dhe derbi me Partianin, dy ndeshje këto të njëpasnjëshme në kampionat përkatësisht më 23 nëntor dhe 1 dhjetor.
Si Elbasani dhe derbi janë një thikë me dy “presa”, sepse tani Tiranës i duhet të fitojë, për t’u ngjitur në renditje, dhe të tregojë forcën para të mëdhave.
Për t’u shënuar është edhe fakti që Tirana nuk ka ndryshuar asnjë presje nga faza e parë. Nëse në 9 javët e para grumbulloi 10 pikë, në këtë fazë të dytë në katër javë ka marrë 4 pikë. Kaq mori edhe në fazën e parë po në katër ndeshjet e para.
