Është caktuar këtë të hënë gjyqtarja që do të rivlerësojë masat e sigurisë në Gjykatën e Posaçme të Apelit për kreun e Partisë së Lirisë Ilir Meta dhe bashkëshorten e tij, deputeten Monika Kryemadhi.
Sipas shortit të hedhur, në Apel është caktuar gjyqtare Igerta Hysi. Ish-presidenti i Republikës, Ilir Meta ka ankimuar vendimin e GJKKO-së për caktimin ndaj tij të masës “Arrest me burg”, ndërsa Kryemadhi ka ankimuar vendimin e GJKKO-së për caktimin ndaj saj të masës “detyrim paraqitje”.
Masat ndaj Metës dhe Kryemadhit janë lëshuar nga SPAK pas bashkimit të dosjeve për çështjen CEZ-DIA, lobimin në SHBA të ish-LSI-së, si dhe hetimin pasuror ndaj tyre.
Ndaj Ilir Metës rëndojnë akuzat për veprat penale “Korrupsioni pasiv i funksionarëve të lartë shtetërorë ose të zgjedhurve vendorë” në 3 (tre) raste nga të cilat në dy raste është kryer në bashkëpunim, “Pastrimi i produkteve të veprës penale ose veprimtarisë kriminale” e kryer në bashkëpunim dhe më shumë se një herë, dhe “Refuzimi për deklarim, mosdeklarimi, fshehja ose deklarimi i rremë i pasurive, interesave private të personave të zgjedhur dhe nëpunësve publikë, ose i cdo personi që ka detyrimin ligjor për deklarim”.
Ndërsa ndaj Monika Kryemadhit rëndojnë akuzat për veprat penale “Korrupsioni pasiv i funksionarëve të lartë shtetërorë ose të zgjedhurve vendorë” në 2(dy) raste dhe në bashkëpunim, “Pastrimi i produkteve të veprës penale ose veprimtarisë kriminale” e kryer në bashkëpunim, dhe “Refuzimi për deklarim, mosdeklarimi, fshehja ose deklarimi i rremë i pasurive, interesave private të personave të zgjedhur dhe nëpunësve publikë, ose i cdo personi që ka detyrimin ligjor për deklarim”.
Për dosjen në fjalë janë nën masën detyrim paraqitje dhe ish-kreu i AKEP, Pirro Xhixho si dhe shtetasja Ema Çoku.
Ndërkohë, ditën e sotme është caktuar gjyqtarja në Gjykatën e Posaçme të Apelit dhe për ish-deputetin socialist Jurgis Çyrbja, i cili po ashtu ka ankimuar vendimin e GJKKO-së për masën e sigurisë “Arrest me burg”
Shorti ka caktuar sërish gjyqtare Igerta Hysin, e cila do të ketë në dorë edhe “fatin” e Çyrbjas.
Ky i fundit u arrestua nga SPAK, pas bisedave mes njerëzve të krimit të organizuar në aplikacionin e enkriptuar “Sky Ecc”, ku u zbulua se si ata ndikuan që emri i Jurgis Çyrbjas, të renditej në listën e sigurt për deputet i Partisë Socialiste për Qarkun e Durresit, në zgjedhjet parlamentare të 25 prillit të vitit 2021.
Edmond Koçi i njohur si Mond Çekiçi, i ekzekutuar pranverën e 2021 dhe Altin Hajrin, i shumëkërkuar nga drejtësia, u kërkuan zyrtarëve të PS-së që Jurgis Çyrbja të ishte i treti në listën e deputetëve.
Çyrbja i shpërblente ata, duke iu dhënë informacion të konsideruar sekret, si dhe iu gjente strehë për t’i shpëtuar arrestimit nga drejtësia.
Ish-deputeti u arrestua në 20 tetor nga SPAK, tre ditë pasi kishte dorëzuar mandatin. Ai është nën hetim si i dyshuar për kryerjen e veprave penale të “korrupsioni aktiv në zgjedhje”, “përkrahja e autorit të krimit” si dhe “tregëtimi i sekretit shtetëror nga shtetasit”.
Bashkë me të ka rënë në pranga edhe Ahmet Masha, vëllai i kunatit të ish-deputetit Çyrbja, si dhe është rishpallur në kërkim Altin Hajri.
