Është futur ditën e sotme në regjimin e posaçëm “41 BISS”në burgun e Peqinit ish-efektivi i forcave komando Neim Avdulaj.
Ky i fundit akuzohet si i përfshirë në grabitjen e 3.2 milionë dollarëve nga blindi me para në Qafë-Kashar nga grupi i Admir Muratajt. Dyshohet se ai ka patur rolin e ndërmjetësi mes informatorëve të transportit të parave të bankës dhe grabitësve. Neim Avdulaj është dënuar me 17 vite e 4 muaj burgim nga Gjykata e Posaçme e Apelit.
Vendimi për ta futur atë në regjimin e posaçëm për 1 vit është kërkuar nga Drejtoria e Burgjeve, teksa është aprovuar nga SPAK, si dhe është firmosur nga Ministria e Drejtësisë.
Burime për mediat bëjnë me dije se aktualisht nga SPAK po shqyrtohen prej javësh edhe 14 kërkesa të tjera, që po mbahen nën vëzhgim dhe janë të dënuar të sigurisë së lartë.
Njoftimi:
Shtetasi i dënuar Neim Avdulaj është futur në regjimin e veçuar për një 1 (një) vit pranë IEVP Peqin. Vendimi është marrë në kuadër të masave për sigurimin dhe mbajtjen nën kontroll të të dënuarve me rrezikshmëri të lartë, duke u bazuar në dënimin e tij prej 17 vite e 4 muaj burgim.
Avdulaj është dënuar nga Gjykata e Shkallës së Parë për Krimet e Rënda Tiranë, me vendim të datës 25.03.2019, i cili u la në fuqi nga Gjykata e Posaçme e Apelit për Korrupsionin dhe Krimin e Organizuar me vendimin nr. 20, datë 12.07.2021. Ai është shpallur fajtor për veprat penale të mëposhtme:
-“Vjedhja e bankave dhe arkave të kursimit” kryer më shumë se një herë, në formën e grupit të strukturuar kriminal;
-“Mbajtje pa leje dhe prodhim i armëve, armëve shpërthyese dhe i municionit,” kryer në mënyrë të përsëritur, në formën e grupit të strukturuar kriminal;
-“Pjesëmarrje në grup të strukturuar kriminal.”
