Kryeministri Edi Rama ka rënë sërish sot “pre” e postimeve të rreme.
Gjatë pasdites, kreu i qeverisë ka postuar në profilin e tij në rrjetin social “Facebook” një foto të 3 arinjëve që shfaqeshin në dëborë dhe sipas tij, fotoja ishte realizuar në bjeshkët e Tropojës.
“Nuk është në Europën e Veriut, po në bjeshkët e magjishme të Tropojës” – shkruan Rama krahas fotos, duke e shoqëruar e disa emoji.
Por, nga një kërkim i thjeshtë në “Google” kupton se fotoja nuk është realizuar në Tropojë, por në Rusi. Siç duket, këtë gjë e ka kuptuar edhe Rama dhe postimi ka zgjatur vetëm disa minuta në profilin e tij dhe më pas është fshirë.
Kjo nuk është hera e parë që kreu i qeverisë bën postime të rreme. Një prej rasteve është në kohën e pandemisë kur kryeministri Edi Rama shpërndau në rrjet një video të rreme, ku sipas tij në Spanjë policia shpërndante me shkopinj gome qytetarët e mbledhur në rrugë, ndërkohë që video ishte ralizuar gjatë një proteste në Algjeri dhe nuk kishte aspak lidhje me pandeminë.
