Partia Demokratike ka thirrur sot në orën 17:00 një protestë kombëtare në vijim të aksionit opozitar të ‘mosbindjes civile’. Ndryshe nga protesta e 7 tetorit këtë herë opozita do të bllokojë akset kryesore të vendit.
Opozita ka paralajmëruar bllokimin e mbikalimit te Kthesa e Kamzës, Segmenti “Casa Italia – Sheshi Shqiponja”, Rrethrrotullimi Milot, Rrethrrotullimi Shkozet, Rrethrrotullimi Rrogozhinë dhe Rrethrrotullimi Levan.
Opozitarët kanë kërkuar leje nga policia e shtetit për protestën që parashikon bllokimin e akseve rrugore në 6 pika të rëndësishme të vendit.
Në pamjet e publikuara nga A2 CNN shihen përgatitjet e policisë te Kthesa e Kamzës në kryeqytet. Jo vetëm efektivë por edhe autobote me ujë po bëhen gati të stacionohen në pikat e “nxehta” ku situata pritet të tensionohet.
Ndërkaq Sali Berisha në daljen e tij të mbrëmjes, u bëri thirrje qytetarëve që të ngrihen në këmbë për të marrë në duar drejtimin e vendit.
Ndërsa kreu demokrat Gazment Bardhi tha një ditë më parë se deputetët e përjashtuar nga seanca shkuan në degët e PD-së për t’u marrë me organizimin e protestës së sotme.
