Shkrimtari dhe publicisti Fatos Lubonja thotë se SPAK po godet personat, por jo sistemin.
Duke komentuar arrestimin e ish-Presidentit Ilir Meta në studion e emisionit “Open”, Lubonja tha se gjithnjë e më shumë, SPAK po shihet si instrument në duart e mazhorancës dhe Edi Ramës.
“A kontrollohet SPAK nga Edi Rama, apo jo? Kjo është çështja në fund fare. Sikur SPAK të mos perceptohet, gjithnjë e më shumë, edhe nga këto ngjarjet që po ndodhin, si instrument në duart e mazhorancës dhe Edi Ramës, mund të ishim të gjithë të kënaqur. Por, një fjalë e vjetër thotë: “E mira matet me qëllimin”, pra varet nga se nisesh.
Ka dhe njerëz që shohin deri tek hunda e tyre që thonë: “Sa mirë ja bënë këtij Ilir Metës. Ka bërë korrupsion”. Problemi është se cili është qëllimi që u arrestua Ilir Meta. Drejtësia apo tjetër gjë? Mendimi është shkatërrimi i opozitës sepse për mua Edi Ramës kjo i ka mbetur. Kredibiliteti i tij për rezultatet është krejtësisht i munguar. Një përçarje dhe eliminim i opozitës, shfarosje andej dhe këtej e lë në krye andej dhe këtej.
Duke parë këto dosje që dalin zbulohet standardi i dyfishtë i SPAK-ut. Pashë dhe këtë dosjen e Metës që ka dalë gjithandej. Kur u bë me Metën, Rama u pyet pse bëri koalicion me të dhe tha se nuk ishte problemi tek individi, por sistemi. Ndaj unë po shoh drejtësinë e SPAK-ut nëse po godet sistemin apo personat. Unë them se po merret me personat dhe jo me sistemin.” – tha Lubonja.
