Ekspertja politike dhe anëtarja e Këshillit Bashkiak të Tiranës, Ilda Zhulali, ngriti shqetësime të thella lidhur me rolin e kryeministrit Edi Rama në kontrollin e pushteteve, duke theksuar se ky kontroll i gjithanshëm po dëmton seriozisht funksionimin demokratik të shtetit shqiptar.
Zhulali argumentoi se në një regjim ku kryeministri kontrollon çdo aspekt të jetës politike dhe institucionale, është e pamundur që të ekzistojnë organizma të pavarur që funksionojnë jashtë ndikimit të tij.
Duke bërë një krahasim të drejtpërdrejtë me Rusinë, ajo theksoi se, ashtu si në këtë vend, nuk mund të flitet për gjykata apo prokurori të pavarura kur çdo gjë kontrollohet nga qeveria dhe aparati shtetëror.
Sipas Zhulalit, SPAK dhe organizmat e tjera të pavarura janë produkt i një procesi përzgjedhjeje të kontrolluar nga mazhoranca socialiste, në një periudhë kur Partia Demokratike nuk ishte pjesë e parlamentit. Ajo theksoi se procesi i emërimeve dhe përzgjedhjes së këtyre figurave kyçe është bërë pa praninë e opozitës dhe, si rezultat, këto institucione janë ndikuar thellësisht nga mazhoranca e Ramës. Për këtë arsye, Zhulali vlerësoi se është iluzore të pritet që një organ si SPAK të funksionojë në mënyrë të pavarur dhe të paprekur nga politika e qeverisë.
“Njerëzit, unë besoj se e kanë kuptuar dhe janë të qartë që në një regjim, pra kur ti ke një kryeministër, i cili kontrollon çdo gjë, çdo hapësirë të pushteteve, nuk mund të ketë një organizëm të pavarur që jeton si një ishull i izoluar brenda këtij shteti, është e pamundur. A mund të flasim ne për një gjykatë ose prokurori të pavarur në Rusi sot? Nuk ekziston.
Nuk mund të ketë në Shqipëri një organizëm me emrin SPAK, apo çfarëdolloj emri tjetër, që të veprojë i pandikuar nga tërësia e vet, për më tepër që ky organizëm zgjidhet nga kush? Nga kush janë zgjedhur këta njerëz? Janë zgjedhur përmes një procesi që është kontrolluar në mënyrë ekskluzive nga mazhoranca socialiste, sepse u bë gjatë kohës që PD nuk merrte pjesë në parlament. Në të gjitha komisionet që i përzgjodhën këta emra, Partia Demokratike nuk ka marrë pjesë, pra ky është një produkt i pastër i Partisë Socialiste ende në pushtet.
Vërtet Edi Rama ndoshta nuk i komandon të gjithë njësoj në të njëjtën formë, por mjetet e presionit në dorën e tij janë të njëjta, me të njëjtën forcë për të gjithë.”– u shpreh Zhulali.
