Komisioneri Publik Florian Ballhysa ka ankimuar në Kolegjin e Posaçëm të Apelit (KPA) vendimin e Komisionit të Pavarur të Kualifikimit (KPK për konfirmimin në detyre të prokurorit të Vlorës, Aurel Zarka, i arrestuar nga SPAK me akuzën e ushtrimit të ndikimit të paligjshëm, si dhe për korrupsion aktiv dhe pasiv.
Ky vendim vjen pas rekomandimit nga Operacioni Ndërkombëtar i Monitorimit (ONM), ku arsyetonte se apelimi dhe një rishqyrtim i pasurisë dhe kritereve të tjera të rivlerësimit nga Kolegji i Posaçëm i Apelimit është bërë i nevojshëm pas arrestimit të Zarkës nga SPAK dhe akuzave ndaj tij për përfshirje në korrupsion.
Në përfundim të aryetimit të tij, Komisioneri Florian Ballhysa i kërkon Kolegjit ndryshimin e vendimit të Komisionit të Pavarur të Kualifikimit për prokurorin Aurel Zarka ose lënien në fuqi të vendimit të KPK-së.
Ish-kreu i Prokurorisë së VLorës, Aurela Zarka u konfirmua në detyrë nga Komisioni i Pavarur i Kualifikimit më 28 qershor, pas një seance dëgjimore të shkurtër në të cilën nuk u vunë në dukje probleme që mund ta cënonin atë. Por një muaj më vonë, më 30 korrik, Zarka u arrestua nga Prokuroria e Posaçme.
Sipas SPAK, prokurori Zarka dhe personat e tjerë akuzohen se kanë ushtruar ndikim të paligjshëm për tetë çështje penale që po hetoheshin në katër prokurori të ndryshme, çështje të cilat lidhen kryesisht me aktivitete të krimit të organizuar si pastrimi i parave apo kultivimi i narkotikëve.
Më kryesore është çështja e njohur publikisht si “Toyota Yaris”, e cila u regjistrua pas bllokimit në portin e Durrësit në qershor të vitit 2018 të 3.4 milionë eurove të thata të fshehura në dy makina të përdorura dhe të importuara nga Belgjika. Aurel Zarka dyshohet se ka ndërhyrë tek magjistratët për të pushuar çështjen dhe për të liruar të akuzuarit.
Ky aksion u ndërmor pas zbërthimit të bisedave të aplikacionit “Sky Ecc”, i përdorur gjerësisht nga krimi i organizuar dhe një nga përdoruesit ishte edhe Aurel Zarka.
