Diplomati dhe analisti politik Agim Nesho ka bërë një analizë të thellë mbi atë që e cilësoi si një proces të rrezikshëm të instalimit të një diktature me karakter fashist në Shqipëri. Duke i kushtuar vëmendje arrestimit të fundit të Ilir Metës, Nesho e përshkroi këtë ngjarje si një akt të mirëplanifikuar për të shpërqendruar publikun nga skandalet e qeverisë dhe për të zhvendosur vëmendjen nga denoncimet e bëra nga Partia Demokratike, e cila ka kërkuar dorëheqjen e qeverisë për shkak të legjitimitetit të saj të dyshimtë.
Ai theksoi se vjedhjet e zgjedhjeve të kaluara janë tashmë të provuara dhe se lidhjet e pushtetit me krimin e organizuar mbeten të forta, duke iu referuar arrestimit të Çyrbes, një anëtar i një bande kriminale që, sipas tij, tregon qartë bashkëpunimin midis qeverisë dhe krimit.
Nesho vlerësoi se arrestimi i Metës nuk është një akt i izoluar, por pjesë e një plani më të gjerë për të goditur të dy liderët kryesorë të opozitës, Sali Berishën dhe Ilir Metën, me qëllim që të paralizohet totalisht opozita dhe të zhbëhet çdo formë kundërshtie ndaj regjimit të kryeministrit Edi Rama.
Duke bërë krahasime me regjime autoritare të tjera në histori, Nesho përmendi arrestimin spektakolar të liderëve të opozitës në Venezuelë si një paralelizëm të fortë me zhvillimet aktuale në Shqipëri, duke e quajtur këtë një shenjë të qartë të ashpërsimit të regjimit në pushtet.
Nesho thekson se regjimi i Ramës ka ndjekur një rrugë të paligjshme dhe të qëllimshme për të zhdukur çdo formë opozitare.
Pavarësisht nga këto përpjekje, Nesho u shpreh me bindje se pushteti nuk do të ketë sukses në asfiksimin e opozitës, duke paralajmëruar se përpjekjet e qeverisë për të shkatërruar pluralizmin politik në vend do të hasin në rezistencë të fortë nga ana e qytetarëve dhe opozitës.
“Për këtë ngjarje do të vazhdojë të flitet sepse tregon karakterin fashist të kësaj diktature që po instalohet në Shqipëri.
Është pikërisht gjithçka një plan i mirëmenduar për të hequr vëmendjen nga ai denoncim që bëri me të drejtë PD-ja dhe kërkoi dorëheqjen e kësaj qeverie, e cila nuk ka legjitimitetin e duhur, pasi vjedhjet e zgjedhjeve të viteve të kaluara janë provuar tashmë.
Vetë arrestimi i Çyrbes, një anëtari të bandës që provon tashmë lidhjet politike me krimin të partisë në pushtet, jo vetëm që kanë qenë të forta, por mbeten ende të tilla.
Arrestimi i zotit Meta është një akt i kryer në mënyrë fashiste, dhe dua të bëj një parantezë këtu: nuk kemi parë që nga 2017, në historinë e demokracive botërore, por as në ato të diktaturave, kur dy liderët kryesorë të opozitës në Venezuelë u arrestuan spektakularisht në mes të natës. Vetëm diktaturat më të egra mund të përdorin forma të tilla.
Unë mendoj se regjimi i Ramës e ka bërë me vetëdije të plotë aktin e arrestimit, një akt fashist, të paligjshëm, për të justifikuar atë që është thelbi.
Sepse ne po shikojmë që lideri kryesor i opozitës, Doktor Berisha, i cili mbahet prej një viti në arrest shtëpie pa akuzë, tani së fundmi po akuzohet për një korrupsion inekzistent, që nuk i mbush syrin asnjë njeriu normal në këtë vend, i cili i ka ndjekur ngjarjet.
Por e njëjta gjë po ndodh edhe me presidentin e Partisë së Lirisë, në të njëjtën mënyrë. Duke goditur të dy liderët, pushteti i Ramës kërkon të asfiksojë dhe të paralizojë opozitën, gjë që do ta ketë të pamundur.”– u shpreh Nesho në Syri Tv.
