Policia e Shtetit ka dalë me një komunikatë zyrtare në lidhje me operacionin për goditjen e rasteve të kontrabandimit dhe tregtimit të kundërligjshëm të produktit mjekësor “Botulinum toxin”, i njohur si “Botox”, nga klinikat estetike.
Burime zyrtare bëjnë me dije se në kuadër të këtij operacioni të koduar “Botulinum toxin” është arrestuar administratori i subjektit që kontrabandonte dhe magazinonte produktin e kundërligjshëm, si dhe furnizonte me të, klinikat. Ndërkohë në pranga janë vënë dhe administratorët e dy klinikave. Policia ka proceduar penalisht administratoret e 5 klinikave, si dhe ka shpallur në kërkim, 3 administratorë klinikash të tjera.
Raportohet se pas kontrolleve të autorizuara nga Gjykata e Tiranës, uniformat blu kanë gjetur në paligjshmëri 30 klinika estetike.
“Nga kontrollet dhe verifikimet në këto subjekte rezultoi se administratorët e tyre nuk deklaronin në organet tatimore, të ardhurat që përfitonin nga injektimi i produktit “Botulinum toxin”, te pacientët, pasi produkti dyshohet se është i kundërligjshëm dhe i kontrabanduar.” – thuhet në njoftimin e autoriteve.
Policia ka arrestuar shtetasit Mildon Kumaraku, Xhuljana Mahmuti dhe Deisa Shehaj. Sipas autoriteteve, shtetasi Mildon Kumaraku është administrator i një subjekti privat që dyshohet se kontrabandon dhe magazinon produktin e kundërligjshëm, si dhe furnizon me të, klinikat. Ndërkaq, shtetaset Xhuljana Mahmuti dhe Deisa Shehaj janë administratore të dy prej klinikave ku injektohej ky produkt.
Procedimi në gjendje të lirë ka nisur për shtetaset A. T., J. B., J. Z., L. C., K. B. dhe E. Sh, si dhe janë shpallur në kërkim shtetasit S. F., K. B. dhe A. F. B., të gjithë adminstratorë klinikash estetike ku injektohej ky produkt. Policia njofton se po punohet për kapjen e 3 shtetasve të shpallur në kërkim.
Ata akuzohen për veprat “Kontrabanda me mallra të licencuara”, kryer në bashkëpunim, “Kontrabanda nga punonjësit që lidhen me veprimtarinë doganore”, kryer në bashkëpunim dhe “Fshehja e të ardhurave”
Materialet procedurale shtesë i kaluan Prokurorisë së Tiranës, për hetime të mëtejshme.
