Kontrolli i Lartë i Shtetit ka kryer një auditim në bashkinë e Këlcyrës, ku ka konstatuar disa shkelje, disa prej tyre të kryera drejtpërdrejtë nga kryetari, Klement Ndoni. Ky i fundit, ka punësuar një zonjë si përgjegjëse dhe anëtare për njësinë e prokurimit me iniciale F.S. Zonja në fjalë punonte me kohë të plotë edhe në bashkinë e Tiranës. Sipas një VKM-je, një autoritet mund të marrë punonjës nga një autoritet/ent tjetër kontraktor në rast të mungesës së stafit.
Por Bashkia Këlcyrë nuk e ka pasur të nevojshme të punësojë një person nga një autoritet tjetër, sepse sipas ligjit nuk është e nevojshme që të ketë patjetër një jurist në njësinë e prokurimit dhe ky institucion ka punonjës me arsim të lartë, që mund të kryenin detyrën e zonjës F.S. Për më tepër, bashkia Këlcyrë nuk i ka dërguar asnjë kërkesë zyrtare bashkisë së Tiranës për t’i kërkuar një punonjës, por ka lidhur një aktmarrëveshje pa protokoll me vetë zonjën.
“Piranjat” u interesuan në bashkinë e Këlcyrës për të zbuluar emrin e F.S, por askush nga punonjësit nuk tregoi. Megjithatë, njëri prej tyre u tregua më i guximshëm dhe na tha se zonja quhet Flora Spahiu. “Piranjat” u përpoqën të kontaktonim me të përmes telefonit, por ajo nuk dha asnjë përgjigje për dypunësimin.
Ndërkohë, KLSh ka konstatuar se bashkia e Këlcyrës ka kontraktuar një kompani, “AZ Distribution”, për të blerë karburant për automjetet. Sipas kontratës, bashkia duhej t’I paguante kompanisë 162 lekë/litër, por i ka paguar 180-200 lekë/litër, mesatarisht 35 lekë më shumë. Madje, bashkia ka shkelur edhe çmimin e vendosur nga bordi I transparencës për karburantet, i ngritur si strukturë gjatë kohës së krizës.
I pyetur nga “Piranjat” në lidhje me këto shkelje, kryetari i bashkisë së Këlcyrës, Klement Ndoni nuk dha asnjë përgjigje./Piranjat
