Presidenti i Turqisë, Recep Tayyip Erdoğan ditën e nesërme (e enjte, 10 tetor) do të jetë për një vizitë zyrtare në Shqipëri, ku do të takohet me presidentin Bajram Begaj, kryeministrin Edi Rama, si dhe do të marrë pjesë në ceremoninë e inagurimit të xhamisë së Namazgjasë.
Në kuadër të kësaj vizite, Policia e Tiranës ka marrë një sërë masash për sigurinë e vizitës së Erdoğan, duke filluar nga aeroporti i Rinasit, shoqërimi drejt Tiranës në vendet ku do të zhvillohen takimet dhe shoqërimi drejt Rinasit, në përfundim të vizitës.
Më konkretisht do të ketë bllokime të disa segmenteve rrugore, si dhe bllokime të pjesshme të disa segmenteve të tjera, në varësi të takimeve dhe aktiviteteve që do të zhvillohen gjatë vizitës, në Tiranë.
Drejtuesve të automjeteve u bëhet apel që të shfrytëzojnë autostradën e re Kashar – Rinas, për të qarkulluar në drejtim të aeroportit të Rinasit.
Ndërkohë, bëhet me dije se do të ketë bllokim dhe të akseve rrugore:
- Nga Rinasi – Qafa e Kasharit – Mbikalimi tek Casa Italia – nënkalimi te ish-sheshi “Shqiponja”, Unazë (Astir) – Rrethrrotullimi i Saukut, Rruga e Elbasanit.
- Bulevardi “Dëshmorët e Kombit”, nga Ura te ish Hotel Dajtit deri te sheshi “Nënë Tereza”, rruga “Ismail Qemali”, rruga “Papa Gjon Pali II”, rruga “Ibrahim Rugova” rruga “Ukraina e Lirë”, bulevardi “Zhan D’Ark” dhe rruga “Xhorxh Bush”.
Më herët u publikua edhe agjenda, ku rreth orës 11:30 është planifikuar që të mbahet pritja në Presidencë, teksa më pas pritert të zhvillojë një takim kokë më kokë me kreun e shtetit, Bajram Begaj.
Rreth orës 12:40 pritet të mbahet mbledhja e përbashkët, mes dy Qeverive dhe firmosja e marrëveshjeve të planifikuar, teksa në orën 14:00 pritet të dalën në konferencë të përbashkët kryeministri Edi Rama dhe presidenti turk Recep Tayyip Erdoğan.
Në orën 16:30 është planifikuar ceremonia e inagurimit të xhamisë së Namazgjasë, ku do të jetë i pranishëm si Rama dhe Erdogan.
Prej vitesh kjo xhami i ka mbajtur dyert mbyllur, për shkak të përplasjeve të Erdogan me Komuniteti Mysliman të Shqipërisë, duke e konsideruar këtë institucion si të kapur nga kundlrshtari i tij Fethullah Gülen.
Duket se tashmë është gjetur zgjidhja dhe imami i xhamisë do të jetë turku Enes Bastur, edhe pse xhamia është në territorin shqiptar.
Komuniteti Mysliman i Shqipërisë ka konfirmuar pjesëmarrjen në ceremoninë e inagurimit të xhamisë së Namazgjasë, ku do të përfaqësohet nga Myftiu i Tiranës, Gazment Teqja, i cili do të jetë gjithashtu edhe kreu i bordit të fondacionit të përbashkët, mes KMSH dhe palës tjetër, që do të administrojë Xhaminë e Namazgjasë më tej.
Në ceremoni do të mungojë kreu i Komunitetit Mysliman të Shqipërisë, Bujar Spahiu, arsyet të cilat nuk janë bërë publike nga KMSH, por lihet të kuptohet për shkak se ai konsiderohet nga Erdogan si një njeri i Fethullah Gülen, të cilën presidenti turk e konsideron si organizatë terroriste.
Shpesh herë Erdogan i ka bërë thirrje Qeverisë shqiptare për të pastruar vendin nga organizata FETO, por duket një kërkese e parealizueshme për shkak të marrëdhënieve që ka Shqipëria me Perëndimin.
Axhenda:
11:30 – 11:40 Ceremonia e pritjes në presidencë
11:40 – 12:40 Takim koke me koke me presidentin Begaj
12:40 – 13:40 Mbledhja e Këshillit të bashkërendimit të nivelit të lartë
13:40 – 14:00 Ceremonia e firmosjes së marrëveshjeve
14:00 – 14:30 Deklaratë Erdogan- Rama
16:30 – 17:30 Ceremonia e inaugurimit të Xhamisë
Megjithatë agjenda e vizitës së presidentit turk mund ti nënshtrohet ndryshimeve në orare dhe takime.
