Tashmë është zyrtare, Komisioni i Etës së Kuvendit, ka zbatuar urdhrin e kryeministrit Edi Rama për përjashtimin e 24 deputetëve të opozitës.
Ky komision me firmat e deputetëve socialist, ka përjashtuar për 60 ditë, Sekretarin e Përgjithshëm të PD-së, Flamur Noka, Kryetarin e Grupin Parlamentar të PD-së, Gazment Bardhi dhe deputetin demokrat Bledion Nallbati.
Ky ndëshkim vjen pas tensioneve dhe kaosit në Parlament të hënën, ku u dogjën jashtë Kuvendit edhe karriget. Ndërkohë deputeti tjetër, Edi Paloka u ndëshkua me 10 ditë përjashtim nga punimet e Kuvendit, ndërsa të tjerët me 40 ditë.
Edhe mbledhja e sotme e Komisionit të Etikës u shoqërua nga kaosi dhe tensionet për shkak të protestës së deputetëve të opozitës në ambientet e Kryesisë së Kuvendit. Në një deklarate për mediat, sekretari i Përgjithshëm i PD, Flamur Noka, pohoi se mosbindja civile do të vazhdojë.
Berisha: Rama veproi si Maduro
Menjëherë pas vendimit të Komisionit të Etikës, ka reaguar kryedemokrati Sali Berisha. Gjatë fjalës së tij mbrëmjen e sotme në protestën poshtë banesës së tij Berisha nuk ngurroi ta krahasonte Ramën, me diktatorin e Venezuelës Nikolas Maduro.
Kryedemokrati theksoi se një vendim i tillë, vjen për shkak të protestës së paralajmëruar me 7 tetor, dhe se revolta popullore po zien në të katërta anët e vendit.
“Sot narkoregjimi njëlloj sikur të ishte Maduro i Venezuelës, i tmerruar nga revolta e deputetëve, i lebetitur nga 7 tetori që po afron mori masa ndëshkimore dhe përjashtoi për herë të parë në historinë 32 vjeçare pluralizëm, përjashtoi 24 deputetë nga përlamenti, ndër të cilët përjashtoi kryetarin e grupit parlamentar pasi ka burgosur zv.kryetarin, Sekretarin e Përgjithshëm të PD dhe 22 deputetë të tjerë.
Këta anëtarë të organizatës kriminale të Edi Ramës, këta bashkëpunëtorë në krim, në vjedhje dhe trafiqe me atë që panë me sytë e tyre në oborrin e parlamentit e kuptuan se kjo betejë është betejë për jetë ose vdekje, është betejë për triumfin e demokracisë, ligjit dhe Kushtetutës.
Ata e panë se shpresë për ta nuk ka më, se revolta popullore që po zien në të katërta anët e vendit do t’i fshijë dhe do t’i hedhë në koshin e plehrave të historisë, aty ku e kanë vendin si keqbërësit më të mëdhenj në historinë e kombit shqiptar.
Ata mendojnë se duke zbrazur parlamentin do shpëtojnë nga ndëshkimi popullor, po ata harrojnë se sot me guximin, trimërinë e parlamentarëve të opozitës, janë qindra e mijëra shqiptarë të gatshëm të ëvrsulen kundër tyre, të gatshëm t’ju shpërblejnë urrejtjen dhe hakmarrjen e tyre, të gatshëm t’ju rezervojnë fundin që meritojnë”, tha Berisha.
Bardhi: Këta të fusin në burg pa ligj e prova, jo më mos të të përjashtojnë nga Kuvendi pa ligj e prova
Kreu i grupit të PD, Gazment Bardhi reagoi pasi sekretariati i Etikës përjashtoi 24 deputetë të PD për kaosin e shkaktuar gjatë seancës plenare të së hënës.
Bardhi shkruan në rrjetet sociale se qeveria të fut në burg pa ligj e prova, jo më mos të të përjashtojnë nga Kuvendi pa ligj e prova. Bardhi thotë se ky vendim tregoi se sa frikacak është kryeministri Edi Rama, ndërkohë që thotë se PS do i ketë përballë, si brenda apo jashtë Kuvendit.
“Këta të fusin në burg pa ligj e prova, jo më mos të të përjashtojnë nga Kuvendi pa ligj e prova. Përjashtimi i opozitës për muaj nga Kuvendi, provon sesa i vogël e frikacak është Edi Rama! Përballë do na kesh, brenda apo jashtë Kuvendit! Asaj salle krimi i ke vënë zjarrin. Fshihu e shmangu sa të duash, përjashto, burgos e përndjek sa të duash, fatin tënd nuk e ndryshon dot! Atë ta ka përcaktuar shumica dërrmuese e shqiptarëve që përbuzin ngritjen e krimit të organizuar në qeverisje dhe shndërrimin e institucioneve në banda kundër opozitës”, shkruan Bardhi.
Gjekmarkaj: Vendim që tregon frikë ndaj opozitës
Edhe nënkryetari i Partisë Demokratike, Agron Gjekmarkaj, ka reaguar pas vendimit të Komisionit të Etikës, ka përjashtuar 24 deputetët e opozitës në parlament,
Në një postim në Facebook, Gjekmarkaj shkruan se vendimi tregon frikë ndaj opozitës, ndërsa më tej thekson se Rama po vepron si në diktaturë.
“Vendimi i sotem i Zonjes “Pushka” e partise me urdher të Edi Rames i dhënë që dje e që ziente korridoreve të Kuvendit është defakto shuarje e Parlamentit!
Një vendim që tregon frikë, deshperim dhe urrejtje ndaj opozites! Bindja “paternaliste” se “une” kam të “drejtë” dhe bej ç’të dua, dhunoj, ndeshkoj dhe me pas rrah gjoksin, është shënjë e qartë e degradimit të ketij Kuvendi dhe mbi të gjitha e kesaj qeverisjeje që pasi ta shtron me korrupsion të mbulon me burgosje politike!
Turp per koleget kukulla të PS që kaq padënjesisht perdoren. Pushteti në çdo rast është i perkohshem, jeta më e gjatë, turpi i perjetshem! Ju lutem mos na buzeqeshni më si “shpirt njeriu” kur të na takoni kolegë të perdorur.
Edhe rregullorja e dhunes e miratuar pak kohe me pare si represion ndaj opozites nuk ka objekt sepse nuk jemi në ato kushte per denime të tilla 40-60! Hakmarrje dhe jo ndeshkim sipas ligjit! Dënim pa ligj si në diktaturë!
E keni në traditen e eterve shuarjen e opozitarizmit! Shqiptaret nuk do ju lejojnë! Nga e hëna fillon perballja çdo ditë e kudo!”, shkruan Gjekmarkaj në Facebook.
Lista e deputetëve të përjashtuar nga Kuvendi:
1.Gazment Bardhi – 60 ditë i përjashtuar
2.Flamur Noka – 60 ditë i përjashtuar
3.Bledion Nallbati – 60 ditë i përjashtuar
4.Edi Paloka – 10 ditë i përjashtuar
5.Saimir Korreshi – 40 ditë i përjashtuar
6.Lefter Gështenja – 40 ditë i përjashtuar
7.Luan Baçi – 40 ditë i përjashtuar
8.Agron Gjekmarkaj – 40 ditë i përjashtuar
9.Dhurata Çupi – 40 ditë i përjashtuar
10.Xhelal Mziu 40 ditë i përjashtuar
11.Ina Zhupa 40 ditë i përjashtuar
12.Zheni Gjergji 40 ditë i përjashtuar
13.Helidon Bushati 40 ditë i përjashtuar
14.Lindita Metaliaj 40 ditë i përjashtuar
15.Ramadan Lika 40 ditë i përjashtuar
16.Asllan Dogjani 40 ditë i përjashtuar
17.Qani Xhafa 40 ditë i përjashtuar
18.Flamur Hoxha 40 ditë i përjashtuar
19.Isuf Çela 40 ditë i përjashtuar
20.Kastriot Piroli 40 ditë i përjashtuar
21.Lodovik Hasani 40 ditë i përjashtuar
22.Kasem Mahmutaj 40 ditë i përjashtuar
23.Edmond Spaho 40 ditë i përjashtuar
24.Dashnor Sula 40 ditë i përjashtuar
Ndërsa kërkesa për ndëshkimin e ligjvënësve të opozitës është bërë nga deputetët socialistë Niko Peleshi, Arkend Balla, Ilirjan Pendavinji, Baftjar Zeqaj, Ilir Topi, Ilir Ndraxhi, Enslemvera Zake, Pranvera Resulaj, Denis Deliu, Ermonela Valikaj dhe Laert Duraj.
