Edhe pas vrasjes së liderit të Hezbollahut Nasrallah, konflikti me Izraelin vazhdon. Reagimet në Liban janë të ndryshme. Ushtria izraelite sulmoi objektivat e milicëve Huti në Jemen.
Edhe pas vdekjes së liderit të Hezbollahut, Hasan Nasrallah, luftimet mes milicisë shiite dhe Izraelit vazhdojnë në Liban. Sipas raporteve izraelite, dhjetëra pozicione dhe depo armësh të Hezbollahut u sulmuan gjatë rifillimit të zjarrit intensiv izraelit në Libanin jugor, ndërsa sipas mediave gjithashtu disa mjekë u vranë.
Ushtria izraelite raportoi se disa raketa goditën veriun e Izraelit, por raketat ranë në zona të hapura pa lënduar askënd. Gjithashtu u raportua se një dron u dërgua në drejtim të Izraelit nga Iraku dhe u kap.
Zi kombëtare në Liban
Libani ka shpallur tre ditë zie kombëtare duke filluar nga nesër për të përkujtuar vdekjen e liderit të Hezbollahut, Hassan Nasrallah. Mbështetësit e tij ende nuk mund ta besojnë atë që ndodhi: “Ne kurrë nuk kemi përjetuar diçka të tillë në jetën tonë”, thotë një kalimtar në Bejrut: “Bombat tronditën tokën, ishte si dita e gjykimit”. Nasrallahu është heroi i kombit arab, Zoti e mëshiroftë”.
Izraeli bombardoi rëndë Bejrutin, kryeqytetin libanez, ditët e fundit, duke përdorur edhe bomba për thyerjen e bunkerëve. Në këtë proces vdiq Nasrallah, lideri i Hezbollahut, i konsideruar si njeriu më i fuqishëm në Liban.
Kryeministri në detyrë Nadschib Mikati u bëri thirrje të gjithë libanezëve që të lënë mënjanë mosmarrëveshjet e tyre dhe të përqëndrohen në “mbrojtjen e atdheut”. Tani është e paqartë se si do të sillet Irani, aleat i Hezbollahut.
Politikanët libanezë si lideri Druze Walid Jumblatt bënë thirrje për bashkim të vendit të ndarë: “Po, Irani ka ndikim të madh në Liban nëpërmjet Hezbollahut, por ne duhet të arrijmë një konsensus të brendshëm për të arritur një armëpushim. Në këtë kohë, unë e di se ka shumë njerëz në Liban dhe gjetkë që kënaqen, por duhet të dimë se edhe kampi shiit ekziston dhe se është e pamundur ta zhdukim atë”.
Akuzat e Teheranit dhe Jeruzalemit
Irani, aleat i ngushtë i Hezbollahut, bëri thirrje për një takim të Këshillit të Sigurimit të OKB-së për shkak të përshkallëzimit të vazhdueshëm. Izraeli ka kryer një “akt flagrant të agresionit terrorist kundër zonave të banuara të Bejrutit”, thotë ai në letrën prej 15 faqesh.
Kryeministri izraelit Benjamin Netanyahu e quajti vdekjen e Nasrallah një “pikë kthese historike” dhe një “larje hesapesh me një vrasës masiv”. Ka qenë një hap i domosdoshëm historik për të ndryshuar ekuilibrin e fuqisë në Lindjen e Mesme, tha ai.
Thirrje ndërkombëtare për armëpushim
Ka thirrje ndërkombëtare për një armëpushim: Presidenti amerikan Biden deklaroi se ishte koha për një armëpushim. Franca gjithashtu bëri thirrje për një fund të menjëhershëm të sulmeve izraelite dhe u shpreh kundër një ofensive tokësore izraelite në Liban, të cilën shumë në Liban e presin.
Ushtria izraelite sulmoi objektivat e milicëve huti në Jemen
Forcat Ajrore izraelite sulmuan termocentralet dhe një port të përdorur nga Hutit aleatë të Iranit në Jemenin perëndimor, thanë të dielën Forcat Mbrojtëse të Izraelit (IDF), një ditë pasi grupi rebel tha se kishte sulmuar me një raketë aeroportin izraelit Ben Gurion.
“Në një operacion ajror në shkallë të gjerë sot, dhjetëra avionë të Forcave Ajrore, duke përfshirë avionë gjuajtës, avionë furnizues me karburant dhe avionë zbulimi, sulmuan objektivat ushtarakë të regjimit terrorist Huti në zonat Ras Issa dhe Hodeida në Jemen,” tha zëdhënësi ushtarak kapiteni David. Avrahami.
Në korrik, pas një sulmi vdekjeprurës me dron të hutive në Tel Aviv, Forcat Ajrore izraelite sulmuan qytetin port të Hodeidah, duke shkaktuar një zjarr masiv dhe gjashtë të vdekur./DW
