Grupi i Lulzim Bashës ka reaguar ashpër ndaj daputetit Agron Gjekmarkaj, i cili gjatë një interviste televizive kritikoi ish-kryedemokratin që nuk bëri asnjë reagim në lidhje me burgosjen e Ervin Salianjit, për shkak se i prishi imazhin Qeverisë duke denoncuar Geron Xhafajn, vëllain trafikant droge të ish-ministrit Fatmir Xhafaj.
Grupi i Bashës e konsideron Gjekmarkajn si një vemje dhe burracak që ka lëpirë çdo gjë që ka pështyrë gjatë karrierës së tij politike, teksa sipas tyre, Lulzim Basha as nuk feston, as gëzon dhe as i përdor rastet si i Salianji.
Më tej ata hedhin akuza për një pazar mes Edi Ramës dhe Sali Berishës për marrjen e vulës së PD-së në këmbim të dënimit të Salianjit.
Reagimi i plotë:
Burracakët që kanë lëpirë çdo gjë që kanë pështyrë gjatë karrierës së tyre politike, kanë qelbur ekranet me shpifje të ndyra. Ndryshe nga këto vemje politike, që si korbat u turren fatkeqësive politike nga Sali Berisha te Ervin Salianji për të përfitur prej tyre, Lulzim Basha as nuk feston, as gëzon dhe as i përdor. Politikanët reagojnë me akte dhe vendime jo me deklarata të tipit “kurrë me Berishën”, e pastaj presin mëshirën e tij poshtë ballkonit.
Ky lëpirësi që u shfaq sot t’u thotë demokratëve si ka mundësi që të njëjtit gjyqtarë që dënuan Salianjin, i’a dhanë vulën Berishës?
Pse këta gjyqtarët dje ishin heronj e sot u bënë vasalë të Edi Ramës?
Pazari i ndyrë Rama-Berisha, merr vulën-jep Salianjin, nuk mbulohet dot me diarrenë mediatike të këtyre vemjeve politike dhe as të mediave të blera prej tyre.
Çfarë tha Gjekmarkaj për Lulzim Bashën
“Basha ka qenë kryetar partie atëherë. Ai e ka bindur Salianjin të bëjë denoncimin këtë denoncim, mendoj se ka qenë denoncim i dobishëm dhe ka përgjegjësi morale, etike dhe politike të ishte sot më shumë se kushdo në krahun e Ervin Salianjit. Nuk e di nëse ka pasur bashkëbisedim personal me Salianjin, por është e turpshme që nuk reaguan në lidhje me këtë ngjarje. Por atij i takonte një reagim publik i fortë, por shoh ka nxjerrë bashkëpunëtorët e tij, ata pak që i kanë mbetur por të duartrokasin vendimet politike të një trupe gjyqësore politike të turpshme me vendime të turpshme mendoj se heshtja e tij është një akt pafytyrësie.”
