Gjatë konferencës me gazetarët, kreu i grupit parlamentar të PD-së, Gazment Bardhi u shpreh i bindur se ish-gjyqtari Artan Gjermeni do të shkojë në burg.
Sipas tij, ai do të dënohet jo vetëm për falsifikimin e dosjes së Ervin Salianjit në Shkallën e Parë, por edhe për lidhje me krimin dhe vendimet që i ka marrë me urdhër të krimit.
Sipas Bardhit, ish-gjyqtarit Gjermeni vetingun do t’ia bëjë Partia Demokratike, edhe se ai i shpëtoi me procedurë duke dhënë dorëheqjen.
“Ka humbur çdo logjikë proporcionaliteti masa që ka marrë krimineli nl Gjykatën e Shkallës së Parë dhe ja këtu do jemi, do shkojë në burg Artan Gjermeni. Këtu do jemi, do shkojë në burg! Jo vetëm për falsifikimin që i ka bërë dosjes së Ervin Salianjit, por për faktin se i ka shërbyer si një shërbëtor i rëndomtë bandave më të rrezikshme në vend. Është një nga gjyqtarët që vendos çfarë thotë krimi në çështje konkrete dhe do të shkojë në burg. Atë vettingun që iu shmang me procedurë duke dhënë dorëheqje të jetë i sigurt se do t’ia bëjë Partia Demokratike. Sepse nuk mund të marrësh vendime që kalojnë çdo logjikë normale në një vend me demokraci të brishtë siç është Shqipëria dhe të keqpërdoresh si një bandit.” – tha Gazment Bardhi.
Më tej, ai vijoi me akuza ndaj SPAK-ut, pasi sipas tij, nuk ka thirrur Taulant Ballën për çështjen e Xibrakës. Bardhi theksoi se për këtë dosje u tentua të gjendej një tjetër aktor për të luajtur Olsi Ramën, vëllain e kryeiministrit Edi Rama.
“Keni dëgjuar ju ta thërrasë SPAK-u Taulant Ballën, i cili tha unë e di kush është i paidentifikuari në dosjen e Xibrakës. E ka thënë në foltoren e Kuvendit. Plani tjetër ishte të krijonin një aktor për ta bërë Ols, siç gjetën një aktor dhe e bënë Geron. PD nuk ka dalë kurrë me asnjë denoncim të saj. Kështu na kanë përqeshur me Rroshin, Kajmakun e të tjerë, pastaj ulnin kokën kur iu arrestoheshin kryebashkiakët, të njëjtën gjë na thanë edhe me Saimir Tahirin, të cilin e shpallën ministër kampion, bashkë me kushërinjtë, por ata shkuan në burg. E vërtetë vonon, por del.”, tha Bardhi.
