Gjykata e Posaçme e Apelit ka ndryshuar pjesërisht masat e sigurisë për mjekët e akuzuar lidhur me skandalin në spitalin Onkologjik në QSUNT, duke lehtësuar pozitat e tyre.
Më konkretisht, Apeli ka zbutur masën e sigurisë për farmacistin Florian Marku, i cili do të hetohet në detyrim për t’u paraqitur, duke iu hequr masa e “arrestit në shtëpi”.
Për babain e mjekut Edmond Gashi, Halil Gashin, administrator i klinikës private “Megis” ku adresoheshin pacientët, Apeli i GJKKO vendosi të shuajë masën e detyrimit të paraqitjes. Gjithashtu masa e sigurisë detyrim paraqitje u shfuqizua edhe për ish-nëndrejtoreshën e QSUT, Brikena Qirjazi.
Në masë arresti në shtëpi për këtë dosje është vetëm mjeku Edmond Gashi, masa e të cilit u konfirmua edhe këtë të mërkurë.
Nën hetim për këtë dosje por që nuk kishin ankimuar vendimin e masës, janë edhe mjekja Alketa Pere, Emiljano Lela, Drilona Kishta, të hetuar në masën e detyrimit për t’u paraqitur në policinë gjyqësore.
Vendimi i sotëm në Apel u mor nga gjyqtari Florjan Kalaja, i cili vendosi parashtrimin e mungesës së kompetencës lëndore të GJKKO-së sa i përket procedimit penal me objekt administrimin e burimit të “Kobaltit” me persona nën hetim ish-nëndrejtoreshën e QSUT, Brikena Qirjazi dhe ish-specialisten Drilona Kishta.
Apeli gjithashtu ngriti konfliktin e kompetencës për një pjesë të dosjes dhe do i kërkojë Gjykatës së Lartë nëse duhet të vijojë të hetohet nga SPAK apo jo.
Hetimi për këtë çështje nisi fillimisht nga Prokuroria e Tiranës, ku nga hetimi i kryer ka rezultuar se pacientëve të diagnostikuar me tumor nuk u jepej trajtimi i duhur mjekësor në spitalin shtetëror dhe më pas drejtoheshin në klinika private. Mjekët e spitalit publik i orientonin pacientët për t’i operuar drejt klinikave private, shpesh herë dhe pa qenë e nevojshme për ta, me qëllimin e vetëm për të përfituar prej tyre.
o ashtu, janë konstatuar raste të blerjes së ilaçeve me vlera të konsiderueshme për kimioterapi, nga farmaci të cilat këto medikamente i tregtonin pa pullën fiskale dhe me kod të prishur, duke krijuar dyshimin në lidhje me autenticitetin e këtyre barnave.
