Rreth 1 orë e 20 minuta ka zgjatur takimi i sotëm i kryeministrit Edi Rama me kryebashkiakët e majtë dhe drejtuesit politik të qarqeve të mbajtur në Pallatin e Kongreseve.
Burime bëjnë me dije se fokusi ka qenë në zgjedhjet parlamentare të pranverës së vitit të ardhshëm, ku kryesocialisti i ka vënë si synim partisë së tij marrjen e 100 mandateve në Kuvend.
Nga takimi i mbajtur me dyer të mbyllura, burime bëjnë me dije se Rama u ka kërkuar kryebashkiakëve identifikimin e emigrantëve në çdo shtet dhe vendosja e një koordinatori në çdo bashki që të merret specifikisht me këtë çështje.
Gjithashtu, Rama u ka kërkuar të zgjedhurve vendore që të kontaktojnë çdo emigrant dhe t’ua shpjegojnë të gjitha çështjet që lidhen me votën e diasporës, ndër to edhe që duhet të pagujnë tarifën e postës.
Po ashtu, Rama u ka kërkuar kryebashkiakëve dhe drejtuesve politik që të japin maksimumin në terren për të maksimizuar votës, duke iu shtuar se ka si synim marrjen e 1 milion votave.
“Fusha është e hapur dhe e gjithë partia e PS duhet të jetë në sulm. Diaspora hambar votash, PS duhet t’i maksimizojë”, mësohet t’u ketë thënë Rama të tijëve.
