Gjykata e Apelit të Posaçëm ka prishur vendimin e GJKKO për trafikantin e drogës, Endi Braçajn, duke i shtuar akuzat dhe dënimin.
GJKKO e kishte dënuar atë me 7 vite e 6 muaj burgim, vetëm për veprën penale “Prodhimi dhe shitja e narkotikëve”, duke i pushuar veprën penale “Grupi i strukturuar kriminal”, teksa nga gjykimi i shkurtuar atij i ulej dënimi në 5 vite burgim.
Por, Apeli i Posaçëm i ka shtuar akuzat duke e shpallur fajtor për kryerjen e veprës penale “Prodhimi dhe shitja e narkotikëve”, e kryer në bashkëpunim të veçantë, në formën e grupit të strukturuar kriminal, si dhe për kryerjen e veprës penale “Grupi i strukturuar kriminal”.
Në total, Endi Braçaj është dënuar nga Apeli me 10 vite burgim, por për shkak se ka pranuar gjykim të shkurtuar dënimi i është ulur në 6 vite e 8 muaj burgim.
Vendimi në Apel është marrë nga trupa gjykuese e përbërë nga gjyqtarët Dhimitër Lara (kryesues) dhe Engert Pëllumbi e Florjan Kalaja (anëtarë).
Vuajtjen e dënimit Endi Braçaj do të kryjë në një burg të sigurisë së lartë.
