Gjykata e Posaçme la në burg Henerigert Mitrin, ish-drejtorin e Policisë Lezhë në hetim në kuadër të operacionit “Revanshi”.
Henerigert Mitri, i cili ishte në kërkim nga SPAK për dosjen “Revanshi”, u vetëdorëzua në Policinë e Tiranës më 11 shtator. Dhe ditën e sotme (14 Shator) doli para togave të zeza ku ndaj tij u caktua masa e sigurisë “arrest me burg”.
Ai akuzohet për kryerjen e veprave penale “kultivim i bimëve narkotike, kryer në bashkëpunim”, “grup i strukturuar kriminal”, “pjesëmarrje në grup të strukturuar kriminal”, “korrupsion pasiv i personave që ushtrojnë funksione publike”, “organizimi ose ushtrimi i veprimtarisë së lojrave të fatit në kundërshtim me ligjin” dhe “shpërdorim i detyrës”.
Akuzat për përfshirje në grupe kriminale
Një nga efektivët me të njohur të policisë sonë u gjend i përfshirë sipas SPAK në një prej grupeve kriminale më të fuqishme në vendin tonë.
Madje Prokuroria e Posaçme në dosjen, pjesë të së cilës i bëri edhe publike, jepte fakte konkrete të përfshirjes së këtij efektivi në kohën kur drejtonte Policinë e Lezhës. Por në momentin kur kolegët e tij hynë në operacion për ta vënë në pranga ai nuk u gjend në banesë dhe deri ditën e djeshme nuk është bërë e mundur të dihej vendndodhja e tij. Dje pasdite policia e Tiranës tha se është vetëdorëzuar ish-drejtori i Policisë Lezhë, Henerigert Mitri, i shpallur në kërkim nga SPAK për dosjen ‘Revanshi’.
Lajmi konfirmohet nga burime pranë DVP Tiranë që me dy rreshta informacion tregoi dorëzimin. Emri i Henerigert Mitrit u zbulua gjatë zhvillimit të operacionit ‘Revanshi’ nga SPAK në maj të këtij viti dhe doli që Mitri në cilësinë e drejtorit të policisë së Lezhës zhvillonte aktivitete të paligjshme si të kultivimit të kanabisit dhe lojërave të fatit. Mitrit iu caktua masa e sigurimit personal “Arrest në burg”, i dyshuar për kryerjen e veprave penale “Kultivim i bimëve narkotike, kryer në bashkëpunim”, “Grup i strukturuar kriminal”, “Pjesëmarrje në grup të strukturuar kriminal”, “Korrupsion pasiv i personave që ushtrojnë funksione publike”, “Organizimi ose ushtrimi i veprimtarisë së lojërave të fatit në kundërshtim me ligjin” dhe “Shpërdorim i detyrës”.
