Kolegji i Posaçëm i Apelimit (KPA) ka lënë në fuqi vendimin e shkallës së parë të vettingut për shkarkimin nga detyra të prokurores së Tiranës, Elina Kombi.
Vendimi i njoftuar këtë të enjte, është marrë në mënyrë unanime të mërkurën më 11 shtator nga trupi gjykues i KPA i kryesuar nga Sokol Çomo, me relatore Natasha Mulaj dhe anëtare Albana Shtylla, Mimoza Tasi e Rezarta Schuetz, pas shqyrtimit në dhomë këshillimi të ankimit të Kombit.
Vendimi i KPA-së është përfundimtar dhe ka efekt të menjëhershëm, duke e larguar përfundimisht prokuroren Kombi nga sistemi i drejtësisë.
Elina Kombi u shkarkua nga detyra prej Komisionit të Pavarur të Kualifikimit (KPK) më 3 shkurt 2022, për probleme të pasurisë, kriterin e vetëm për të cilin u përmbyll hetimi administrativ.
Gjatë seancës dëgjimore u konstatuan pamundësi financiare për blerjen e një apartamenti në Pogradec të përfituar nëpërmjet privatizimit; për ndërtimin e një shtese; për një shtëpi me tre kate të trashëguar prej bashkëshortit nga i ati, por ku ka investuar edhe subjekti; si dhe u ngritën dyshime se në këtë rezidencë ushtrohej veprimtari hotelerie e paregjistruar.
Elina Kombi e filloi karrierën në sistemin e drejtësisë në vitin 1994. Ajo punoi fillimisht si prokurore në Prokurorinë e Pogradecit dhe prej vitit 2013 e deri në shkarkimin nga detyra e ushtroi funksionin në Prokurorinë e Tiranës.
