Eksperti i ekonomisë Gjergj Buxhuku, për rritjen me 3.4% të investimeve të huaja në tremujorin e dytë të vitit thotë se pasuritë e paluajtshme janë përgjithësisht investime që konsiderohen të sigurta.
Duke folur për MCN, ai deklaroi se çmimet mesatare në Bashkimin Europian janë ende më të larta se në Shqipëri dhe për këtë arsye investohet.
Buxhuku gjithashtu ngriti dyshime se kompanitë e huaja që investojnë në Shqipëri mund të jenë kompani “offshore”, me pronarë fundorë shqiptarë.
“Cilët janë këta investitorë të huaj që sjellin investime të huaja direkte, mos vallë janë kompani guaska, që në thelb janë investime shqiptare që kanë ardhur nga një bankë e huaj dhe janë rifutur në Shqipëri. Druaj se një pjesë e madhe e këtyre investimeve direkte, i përket këtyre kompanive që në themel të tyre kanë pronar fundor shqiptarë dhe jo të huaj.
Gjithë ky fluks që hyn në vendin tonë, çon në forcimin e monedhës vendase. Fuqizimi i monedhës kombëtare nuk është nga zhvillimi ekonomik. Kemi flukse valutore jashtë kanaleve formale dhe kjo është një kambanë alarmi. Monedha kombëtare është forcuar, por fuqia blerëse e saj nuk është rritur. Çmimet janë gjithmonë mjaft të larta dhe niveli i jetesës në Shqipëri nuk është përkthyer në rritje, me përjashtim të kategorive të caktuara që mund të kenë ndjerë një rritje, por shumica nuk e ka ndjerë.
Forcimi i ndjeshëm i monedhës tonë kombëtare kundrejt euros dhe monedhave të tjera, ndërkohë qëndrim në vend në mos ulje e fuqisë blerëse. Janë politikat ekonomike që sjellin zhvillim të qëndrueshëm të vendit.” – deklaroi Buxhuku.
