Eksperti i ekonomisë Gjergj Buxhuku tha në “MCN” se Banka e Shqipërisë e ka lejuar me vetëdije të plotë skemën e mashtrimit të mikrokredive.
Sipas tij kjo skemë është një sistem i ri fajdesh, në thelb më i rëndë se ai i vitit 1997, pasi kryhet brenda sistemit financiar.
“Skema e mikrokredive në Shqipëri fatkeqësisht ka marrë pamjen e një sistemi të plotë fajdesh. Është më e rëndë se ajo e vitit 97, ku sistemi i fajdeve u zhvillua jashtë tregut financiar ligjor, kjo që ka ndodhur 8-9 vitet e fundit ka ndodhur brenda sistemit financiar. Përgjegjësia e Bankës së Shqipërisë është absolutisht e plotë. Banka e Shqipërisë duhet t’i monitoronte në vazhdimësi kompanitë e mikrokredive. Shkaku është përgjegjësia e plotë ligjore e BSH, me veprimet dhe mosveprimet e saj, me veprime pasi ka licencuar kompani, ku një pjesë janë në pronësi të individëve, edhe nga shtete jo mike të Shqipërisë, si rusë e me radhë, apo kompani që janë larguar për këto arsye nga vendet e rajonit.
Banka e Shqipërisë ka lejuar me vetëdije të plotë, fatkeqësisht pas 30 vitesh, një sistem i ri fajdesh që në thelb është më i rëndë se ai i 97-ës. Për fatin e mirë përmasat janë më të vogla se të 97-ës, por format dhe përmbajtja janë të njëjtat. Është një fenomen që ka 10 vjet që lulëzon. Mediat buçasin nga reklamat. Banka e Shqipërisë duhet të kishte përcaktuar me kohë tavanin e interesave, nuk ishin disa herë më të larta se e tregut bankar formal. Penalitetet shkojnë me dhjetëra, qindra herë më të larta. Para dy vitet kush e pengoi Bankën e Shqipërisë që të vinte tavan mbi penalitetet. A kemi një raport të plotë se cilat kompani të mikrokredisë e kanë shkelur apo respektuar këtë tavan 30 për qind? Këto çështje duhet të sqarohen. Nuk kemi asnjë raport nga Banka e Shqipërisë se sa kompani e kanë shkelur. Në momentin që është shkelur tavani, duhet t’u kishe hequr licencën dhe t’i konfiskoje.
Ironikisht jemi në situatën post-97’. Duam apo s’duam ne këto dhjetëra mijëra raste është e vështirë të trajtohen një nga një në gjykatë. Duhet një ligj i veçantë. Banka e Shqipërisë mban përgjegjësi të plotë ligjore që ka krijuar një terren të përshtatshëm për operatorët e tregut të mikrokredive. Banka e Shqipërisë duhet të rishikojë të gjitha licencat që ka dhënë. Licencat për vende nën embargo, jo mike, dhe kompani të dëbuara nga vendet e rajonit, duhen parë me themel. Ka kompani me pronarë nga Rusia. Janë pjesë e atyre që bëjnë kërdinë në tregun e mikrokredive. Këto mund të përdoren edhe për të prishur rendin kushtetues në Shqipëri. ” – tha Gjergj Buxhuku.
