Eksperti i ekonomisë Gjergji Buxhuku duke folur në “MCN TV” tha se është e fryrë shifra prej 10 milionë turistësh të mbërritur në Shqipëri.
Sipas Buxhukut deklaratat e Ramës dhe Kumbaros janë politike. Një arsye pse pompohet kjo shifër, sipas ekspertit, është për të fshehur para ndërkombëtarëve flukset e parasë informale që hyn në Shqipëri.
“Unë mendoj që shifra prej 10 milionësh është tej mase jo reale. Është shumë e fryrë. Edhe te ky numër i madh i turistëve që kanë ardhur vitin e kaluar, pjesa dërrmuese i takon turizmit të kuriozitetit, që vjen si pasojë e potencialit të pazbuluar të Shqipërisë në 50 vite diktaturë. Nuk është se ne ofrojmë ndonjë portofol turistik, joshës dhe konkurrues, krahasimisht me vendet e tjera. Një individ e shuan kuriozitetin herën e parë, s’ke më kuriozitet për të ardhur, nëse s’i ofron një standard konkurrues në raport me vendet e tjera. Kuriozitetin e ka shuar dhe gjithçka kthehet në bumerang. Ne mos mendojmë se erdhën turistët, lanë paratë dhe ne nuk kemi kosto. Nëse llogarisim kostot në rrugë, autostrada, në aeroporte, shëndetësi, derdhje të ujërave të zeza, janë kosto të mëdha. Për mua deri më tani jemi negative, janë qindra milionë euro të investuara.
Ne duhet ta ndajmë politikën nga realiteti. Nëse themi që kemi 900 mijë turistë italianë, mos harrojmë që në Itali kemi 700 mijë shqiptarë rezidentë! Nëse do të futemi në termat elitarë, për të qenë konkurrent me të tjerët, do ta kemi shumë të vështirë. Nuk e di që projekti i Alabarit do jetë turistik, e di që do jetë rezidencial. Jemi përpara një bumi, që s’është meritë e jona, por e izolimit që ka pasur Shqipëria. Që të marrësh hisen në industrinë turistike, aq më tepër elitare, është jashtëzakonisht e vështirë, sepse ke të bësh me njeriun. E ke të vështirë që të jesh konkurrues sepse je prapa në infrastrukturë, në burime njerëzore. Numri prej 10 milionësh është shumë i fryrë, por përdoret që t’i tregosh para partnerëve ndërkombëtarë, që gjithë këto para që kanë ardhur, dhe nuk justifikohet nga burimet formale të ekonomisë, ka ardhur nga këto flukse turizmi. Një arsye pse pompohet 10 milionëshi është edhe për të fshehur këto flukse parash që vijnë në ekonominë shqiptare” – u shpreh Buxhuku.
