Një ngjarje e rëndë ka ndodhur mesditën e kësaj të marte Roskovec të Fierit rreth orës 14:00.
Dy persona kanë mbetur të vdekur pas të shtënave me armë zjarri. Viktimat janë Ladimir Kurtaj dhe Gramoz Kurtaj, xhaxha dhe nip.
Ladimir Kurtaj dhe Gramoz Kurtaj janë qëlluar për vdekje me breshëri plumbash nga 49-vjeçari Altin Kuka dhe shkak për ngjarjen dyshohet se ka qenë një sherr i nisur mes fëmijëve të tyre duke degjeneruar më pas në përdorimin e armës së zjarrit nga Altin Kuka.
“Rreth orës 14:00, në fshatin Kurjan, dyshohet se shtetasi A. K., 49 vjeç, ka vrarë me armë zjarri, shtetasit L. K. dhe G. K.
Shtetasi A. K. është shoqëruar në Komisariat, për kryerjen e veprimeve procedurale.
Arma e zjarrit është sekuestruar në cilësinë e provës materiale.”– njoftoi policia.
Altin Kuka është vetëdorëzuar pas vrasjes së dyfishtë, por ende nuk dihet se çfarë ka deklaruar para uniformave blu.
Drejtori i policisë së Fierit, Shpëtim Hasanaliaj doli në një deklaratë për mediat duke dhënë sqarime për rastin.
Ai tha se motivi për ngjarjen e rëndë është bërë një grindje mes viktimave dhe djalit të autorit.
“Rreth orës 14:00 në fshatin Kurjan ka ndodhur një ngjarje e rëndë kriminale, ku shtetasi Altin Kuka, banues në Fier dyshohet si autori i ngjarjes së ndodhur, duke vrarë me armë zjarri automatik dy shtetas, xhaxha dhe nip, të cilët kanë ndërruar jetë menjëherë në vendngjarje. Pas kryerjes së këtij akti kriminal shtetasi Altin Kuka është vetëdorëzuar në polici së bashku me armën e krimit. Dyshohet se ka ndodhur për motive të dobëta, për shkak të një grindje që ka ndodhur mes djalit të tij dhe dy viktimave”, tha Hasanaliaj.
Arma e krimit është sekuestruar në cilësinë e provës materiale.
