Kolegji Zgjedhor ka rrëzuar animimin e koalicionit “Bashkë Fitojmë”, i cili kërkonte shpalljen e pavlefshme të zgjedhjeve të pjesshme për kreun e Bashkisë së Himarës, të cilat u mbajtën më 4 Gusht.
PD i çoi zgjedhjet e Himarës në Kolegj Zgjedhor, pas vendimit të Komisionit për Ankimimet dhe Sanksionet (KAS), që i cilësoi të vlefshme.
Opozita kërkonte shpalljen e pavlefshmërisë në të 36 Qendrat e Votimit, me arsyetimin se ka prova të mjaftueshme për problematika dhe parregullsi të rënda gjatë procesit të votimit.
Sipas koalicionit “Bashkë Fitojmë”, zgjedhjet në Himarë u mbajtën në një klimë politike të ngarkuar ndërkohë që akuzon mazhorancën për pengim të votuesve, siç ishte rasti i kartave të identitetit të skaduara, zbarkimin e administratës në Himarë dhe pa lënë mënjanë intimidimin ndaj votuesve e bizneseve të zonës.
Por, Kolegji Zgjedhor ka votuar unanimisht për të konfirmuar rezultatin, duke mos konstatuar asnjë shkelje apo problematikë.
Me vendimin e Kolegjit Zgjedhor, që është hallka e fundit e ankimimit për rezultatin zgjedhor, i hapet rrugë betimit të Vangjel Tavos si kryebashkiak.
Në zgjedhjet për kreun e Bashkisë së Himarës, kandidati i socialistëve Vangjel Tavo fitoi me 5022 vota, përkundër kandidatit të opozitës Petro Gjikuria me 3545 vota.
