Qeveria e Kosovës e miratoi të mërkurën Projektligjin për Sigurimin e detyrueshëm Shëndetësor.
Me asnjë votë kundër dhe asnjë abstenim, anëtarët e kabinetit e miratuan projektligjin, i cili tani duhet të dërgohet në Kuvend për aprovim.
Ministri i Shëndetësisë, Arben Vitia, tha se kjo nismë është paraprirë nga një proces i detyruar planifikimi, analizimi dhe diskutimi, dhe se “ky është moment vendimtar për shtetin tonë”.
“Ky projektligj është hapi themelor drejt krijimit të sigurimeve shëndetësore në vendin tonë. Ky proces është i pakthyeshëm dhe si të tillë e nisim sot këtu në këtë mbledhje. Me këtë nismë themelohet fondi i sigurimit të detyrueshëm shëndetësor i republikës së Kosovës”, tha Vitia.
Zbatimi i këtij ligji do të jetë “një ndër sfidat kryesore e Qeverisë sonë”, tha Vitia.
Buxheti për sistemin e përgjithshëm shëndetësor për vitin 2024 kap vlerën e 345 milionë eurove.
Sipas projektligjit, fondi i sigurimeve do të mbështetet edhe nga kontributet e punëtorëve.
“Këto kontribute do të jenë një nga burimet e rëndësishme të financimit të shëndetësisë në të ardhmen e afërt. Buxhetit që ndahet për shëndetësinë do t’i shtohen edhe kontributet e secilit prej nesh nga të hyrat personale”, theksoi ai.
Kosova nuk ka sigurime shëndetësore, ndonëse në vitin 2007 u miratua ligji për këtë çështje, por asnjëherë nuk hyri në fuqi, pasi shefi i atëhershëm i Misionit të Kombeve të Bashkuara në Kosovë nuk e nënshkroi.
Pas pavarësisë së Kosovës në vitin 2008, ishin vetë qeveritë e Kosovës ato që e tërhoqën ligjin, për shkak të implikimeve buxhetore.
Kuvendi i Kosovës arriti ta miratonte Ligjin e ri për sigurime shëndetësore në vitin 2014, mirëpo as ai nuk u zbatua.
Zbatimit të tij u tha se do t’i paraprinte një periudhë prej gjashtë muajsh për mbledhjen e fondeve, e cila do të niste nga 1 korriku i vitit 2017./REL
