Politologu Ilir Kalemaj ka komentuar nismën e re të qeverisë për të hapur një Departament për shqiptarët në rajon, ku sipas tij nuk është asgjë serioze.
I ftuar në MCN TV, politologu theksoi nisma anashkalon Maqedoninë e Veriut dhe synon të shigjetojë Kurtin, përmes patronazhit për shqiptarët në Preshevë dhe Malin e Zi, ku vitet e fundit ka një rivalitet me Prishtinën.
I pyetur se sa serioz është angazhimi i ri i Shqipërisë në rajon, Kalemaj tha se nuk sheh asgjë serioze. Ndërsa më tej ai shtoi se i ka bërë përshtypje lërja në harresë e shqiptarëve që jetojnë në Maqedoninë e Veriut.
“Si mund t’i referohesh Preshevës, apo Malit të Zi, ku janë 2-3-4 për qind shqiptarë, dhe s’i referohesh Maqedonisë së Veriut ku ke një popullsi shtetformuese 33 për qind shqiptarë. Si mund t’i referohesh një shteti sovran, që është Kosova, e mëvetshme. Ku e ke marrë t’i këtë model?! Ky model që fut Kosovën duket më tepër një shigjetim ndaj qeverisë Kurti”, tha ai.
Kalemaj vë në dukje se Kosova është një shtet i mëvetësishëm dhe sovran, dhe nuk ekziston një model i tillë për diasporën.
“Ne kemi pasur dikur një drejtori për diasporën, pastaj u bë ministri, kemi pasur samite për diasporën, por kjo është pjesë e fasadës, pjesa e përmbajtjes lë shumë vend për diskutim dhe pakënaqësi. Sot që flasim duket se ka një gjysmë drite jeshile për lejimin e votës së diasporës, megjithatë ishte shumë i vonuar dhe u desh rekomandimi i përsëritur i OSBE/ODIHR, dhe vendimi i Kushtetueses për të shkuar drejt finalizimit të marrëveshjes politike. 1,6 milionë shqiptarë punojnë në diasporë. Largimi i trurit, çfarë politikash kanë ndërmarrë qeveritë, dhe qeveria aktuale për kthimin e tyre. Ka pasur strategji për punëtorë nga Bangladeshi, por ka dështuar. Një arsye ishte që e përdornin Shqipërinë si trampolinë për vendet e BE-së, dhe një arsye tjetër është që rroga mesatare në Bangladesh atje u rrit vendet e fundit. Në momentin që bëhesh i pakonkurrueshëm, nuk arrin dot të tërheqësh punëtorë apo të jesh atraktivë për punonjës nga Bangladeshi, imagjino sa të vështirë e ke për punonjës nga India apo Filipinet, meqë janë edhe vendet kryesore ku po kërkojmë të rekrutojmë punonjës, dhe për këtë arsye është përfolur për hapjen e ambasadave të reja në Indonezi apo gjetkë. Ndërkohë që ti nuk po frenon ikjen e trurit nga Shqipëria, ndërkohë që s’po frenon rënien e kurbës së euros që penalizon eksportuesit, s’po tërheq investitorë të huaj. Skema e pasaportave të arta dështoi, për shkak se edhe vende të BE, si Malta dhe Bullgaria, u detyruan të hiqnin dorë prej saj si pasojë e presionit nga BE. Kjo është skemë për t’i shitur oligarkëve të vendeve të ndryshme, që synojnë parajsa fiskale, për të parkuar paratë e tyre, dhe mund të synonin edhe Shqipërinë.
Nuk e shoh aspak serioze. Ajo që më tërhoqi vëmendjen ishte që do krijojmë një departament për shqiptarët në rajon. Ajo që më bëri përshtypje është si ka mundësi që harrohet Maqedonia e Veriut, dhe përfshihet Kosova, që është shtet i mëvetshëm dhe sovran. Ka 2 ose 3 lloj diasporash, diaspora e vjetër që ka emigruar para çlirimit, diaspora e pas viteve 90’, dhe kemi një lloj të tretë që janë vendet rreth e rrotull që kanë popullsi shqiptarësh etnikë. Kjo drejtori s’është për diasporën sepse do ishte për shqiptarët kudo, por është për vendet e rajonit. Si mund t’i referohesh Preshevës, apo Malit të Zi, ku janë 2-3-4 për qind shqiptarë, dhe s’i referohesh Maqedonisë së Veriut ku ke një popullsi shtetformuese 33 për qind shqiptarë. Si mund t’i referohesh një shteti sovran, që është Kosova, e mëvetshme. Ku e ke marrë t’i këtë model?! Ky model që fut Kosovën duket më tepër një shigjetim ndaj qeverisë Kurti, apo vazhdim i problematikës që kanë pasur dy liderët në vitet e fundit, dhe nga ana tjetër duket një anahkalimi që i bëhet Maqedonisë së Veriut, dhe një lloj patronizimi që i bëhet Preshevës dhe Malit të Zi, ku ka një lloj rivaliteti me Prishtinën, sepse edhe Prishtina vitet e fundit ka tentuar të fitojë një lloj patronazhi për shqiptarët e rajonit”, tha ia.
