Kryedemokrati Sali Berisha gjatë fjalës së tij në protestën e mbrëmjes së sotme, ka hedhur akuza të forta mbi vëllain e trafikantit të drogës, Fatmir Xhafa, për të cilin tha se është në krye të mafies shtetërore që sundon Pogradecin.
“Se klani Xhafa në Pogradec përcakton çdo gjë, bën çdo ligj, merr çdo vendim, dikton gjithçka. Dhe se ky klan qëndron natyrisht në Pogradec mbi ligjin, mbi shtetin, ka mposhtur dhe ka vendosur sundimin e tij”, tha Berisha.
Ndërsa më tej, kryedemokrati theksoi se Pogradeci është më në terror nga bandat se sa Elbasani, Durrësi apo ndonjë qytet tjetër.
Deklarata e plotë:
Mirëmbrëma dhe përshëndetjet më të përzemërta ju guximtareve dhe guximtarëve të pamposhtur, misionarëve të kauzës së drejtë të shqiptarëve.
Mirënjohje të pakufishme ndaj jush, oratorëve të kësaj platforme që me fjalën e tyre përcjellin të vërteta në mendjet dhe zemrat e shqiptarëve.
Miqtë e mi, sot qindra dhe mijëra qytetarë protestojnë para kryeministrisë.
Protestojnë për jetën e humbur, drejtësinë e munguar, vrasjen mafioze të një qytetari, të një prindi, të një bashkëshorti, i cili qëndroi heroikisht ndaj një vrasësi gjobëvënës.
PD mbështet çdo protestë për çdo kauzë të drejtë kudo që ajo zhvillohet.
Por kauzë më të drejtë se ajo për jetën nuk ka dhe nuk mund të ketë.
Të dashur miq, një ditë më parë unë kam marrë një mesazh nga një qytetar i Pogradecit, i cili më shkruan se Pogradeci është sot më në terror se sa Elbasani, Durrësi apo ndonjë qytet tjetër.
Se Pogradeci është nën sundimin e plotë, total të mafies shtetërore me në krye Fatmir Xhafën.
Se klani Xhafa në Pogradec përcakton çdo gjë, bën çdo ligj, merr çdo vendim, dikton gjithçka.
Dhe se ky klan qëndron natyrisht në Pogradec mbi ligjin, mbi shtetin, ka mposhtur dhe ka vendosur sundimin e tij.
Po kjo është kudo!
Protesta e qyteraëve, Berisha: Drejtësia është aleate dhe bashkëpunëtore me krimin dhe mafien
Ndërsa për protestën e zhvilluar për vrasjen e Egli progës, Berisha tha se qytetarë që protestojnë në bulevardin ‘Dëshmorët e Kombit, protestojnë sepse drejtësia është aleate, është bashkëpunëtore me krimin, me mafien.
“Ata qytetarë që protestojnë në bulevardin ‘Dëshmorët e Kombit, protestojnë sepse drejtësia është aleate, është bashkëpunëtore me krimin, me mafien.
Vrasje pa dashje e quajti përfaqësuesja e drejtësisë faqezezë, e drejtësisë së re të Edi Ramës, marrjen e jetës të Egli Progës në mes të rrugës në Pogradec.
Vrasje pa dashje e quajti në Vlorë, vdekjen e biznesmenit pas qëllimit të tij me grusht nga djali i prokurores. Edhe ai për gjobëvënie.
Sigurisht, drejtësia politike ka krijuar modelet e veta kriminale për mbrojtjen e krimit qeveritar, për mbrojtjen e krimeve të Rilindjes, për mbrojtjen e krimeve të sojit të pushtetarëve të sotëm.
Ndaj dhe rruga e vetme është protesta, protesta, protesta”, tha kryedmokrati.
