Pronarët e tokave të cilat do të preken nga ndërtimi i portit të ri tregtar në Porto Romano do të shpronësohen me para në dorë ose me një pronë shtetërore nga shtetit.
Shpronësimi do të bëhet për trojet rreth Porto Romanos për të krijuar kapacitete magazinuese dhe shërbimi.
Shkëmbimi tokë private-tokë shtetërore do të bëhet vetëm në rastet kur ka dakordësi unanime me pronarët dhe nëse nuk arrihet një marrëveshje mes palëve do të bëhet kompensimi për pasurinë në vlerë financiare.
Gjatë fjalës në prezantimin e projektit të Porto Romanos rreth një javë më parë kryeministri Edi Rama deklaroi se që për ndërtimin të disbursohen në fazën e parë 329 milionë euro.
Janë gjithsej 309 pronarë të pasurive të paluajtshme me sipërfaqe gati 1.5 milionë m2 që preken nga projekti. Vlera e shpronësimeve përllogaritet në mbi 821 milionë lekë. Kjo shumë do të përdoret në rastet kur nuk do të arrihet marrëveshja për shkëmbim pronë private me tokë shtetërore.
Por, cilët janë personat që përfitojnë nga shpronësimet e tokave në Porto Romano?
Në listën e fazës së parë, një prej përfituesve është biznesmeni Ismail Mulleti, i cili posedon 2 hektarë tokë në emrin personal në listën e shpronësimeve të portit të ri. Një sipërfaqe tjetër prej gjysmë hektari ai e posedon në emrin e kompanisë GFI.
Një përfitues tjetër është edhe Shpresa Breçani, e cila posedon të paktën 1.6 hektarë tokë në zonën pranë Porto Romanos.
Në listën e shpronësimeve rezulton edhe biznesmeni Shkëlqim Beshiri me 602 metra katrorë pronësi.
Një pjesë të mirë të parave nga shpronësimi i tokave në “Porto Romano” do ta marrë kompania e quajtur “Stellar Real Estate”, e cila rezulton në listë me të paktën 8 hektarë tokë. Kjo kompani është me pronarë ende të panjohur dhe e regjistruar në Gjibraltar, teksa rezulton në lidhje biznesi me Ismail Mulletin.
Në Tiranë filialin e administron juristja e quajtur Entela Shehaj (Memishaj), e cila rezulton gjithashtu dhe ortake me Ismail Mulletin në kompaninë “IMAH 2014”. Shehaj posedon 10% në këtë kompani, ndërsa Mulleti 45%.
Ndërkohë në listë janë dhe biznesmenë të tjerë të njohur shqiptarë që posedojnë territore në këtë zonë.
Qeveria Rama ka përcaktuar një bazë çmimi prej 6 eurosh (kursi i këmbimit 13 gusht 2024) për metër katror në vendimin e shpronësimit. Aktualisht çmimi për metër katrorë në këtë zonë është rreth 100 euro, për metër katrorë.
Këta pronarë mund ta ankimojnë me lehtësi çmimin në gjykatë administrative për të kërkuar çmim tregu. Procesi është i thjeshtë pastaj, gjykatësi i kërkon hipotekës zyrtarisht se me çfarë çmimesh janë bërë transaksionet e tokave nga privatët dhe çmimin mesatar e përcakton si marzh shpronësimi.
