Deputeti i PS-së, Vullnet Sina ka reaguar në lidhje me kërkesën për mocion të PD-së, për heqjen e mandatit të tij, pasi e akuzojnë se ka përfituar për kompaninë e tij private nga buxheti i shtetit.
Sipas demokratëve, deputeti Sina ka përfituar të ardhura nga Buxheti i Shtetit, në vlerë disa milion lekë, përmes 9 kompanive të tij private, gjatë periudhës ku ushtron edhe mandatin e deputetit. Më konkretisht, ai ka shkelur pikën 3 të nenit 70 në Kushtetut, ku thuhet qartë se: “Deputetët nuk mund të kryejnë asnjë veprimtari fitimprurëse që buron nga pasuria e shtetit ose e pushtetit vendor dhe as të fitojnë pasuri të këtyre”.
Në një reagim në Facebook, Sina thekson se që nga viti 2017 ka dhënë dorëheqje nga administrimi i të gjitha bizneseve, duke iu përkushtuar vetëm politikës.
Mes të tjerash ai shton se “nuk kam përfituar nga buxheti i shtetit asnjë lekë, as kur nuk kam qenë deputet, as kur jam zgjedhur deputet.”.
Deklarata e plotë:
Mësova me habi dhe jo pa humor, kërkesën për mocion të Partisë Demokratike për heqjen e mandatit tim si përfaqësues i Partisë Socialiste në Kuvendin e Republikës së Shqipërisë.
Gjobëvënësit mediatikë e përsërisin këtë këngë gjinkallash nga viti 2017. Por, surpriza është që thashethemet e portaleve përdoren nga opozita duke i kthyer në akte politike.
Per sa më sipër, deklaroj me përgjegjësi të plotë:
1. Në zbatim të nenit 70, pika 3 e Kushtetutës, nga viti 2017 kam dhënë dorëheqje nga administrimi i të gjitha bizneseve të mia, duke iu përkushtuar vetëm politikës.
2. Me vendimet e depozituara në QKB në vitin 2017, kam vendosur transferimin e të gjitha kuotave të kompanive, sipas ligjeve në fuqi.
3. Nuk kam përfituar nga buxheti i shtetit asnjë lek, as kur nuk kam qenë deputet, as kur jam zgjedhur deputet.
Për më tepër, dhuroj prej vitesh rrogën mujore të deputetit për të ndihmuar njerëz në nevojë dhe as më shkon mendja të përfitoj financiarisht nga buxheti i shtetit.
