Policia e Tiranës ka arrestuar dy vëllezër të cilët akuzohen se shantazhonin shtetase te ndryshme, për dhënie parash, për mospublikimin e videove dhe fotove personale të tyre, në rrjete sociale.
Në kuadër të operacionit policor të koduar “Cybersnare” janë vënë në pranga vellëzërit Halim Malja, 20 vjeç, dhe Jurgen Malja, 18 vjeç, banues në Tiranë.
Autoritetet policore raportojnë se kanë bërë dokumentimin e plotë ligjor të veprimtarisë kriminale të dy vëllezërve. Sipas bluve të kryqytetit dyshohet se në bashkëpunim me njëri-tjetrin, dy vëllezërit krijonin profile nëpër aplikacione virtuale, dhe pas komunikimeve me persona të ndryshëm, kryesisht të gjinisë femërore, siguronin materiale foto e video intime, dhe për mospublikimin e këtyre materialeve, kërkonin shuma të ndryshme parash.
Gjithashtu, Policia raporton se nga veprimet hetimore të kryera janë dokumentuar ligjërisht dy raste të kësaj veprimtarie kriminale, nga të cilat dy vëllezërit kanë përfituar shuma parash nga një 14-vjeçare.
Burime për mediat bëjnë me dije se e mitura kishte marrë pa leje nga shtëpia rreth 1 milion lekë të vjetra dhe ua kishte dorëzuar shantazhuesve që të mos i shpërndanin fotot.
Policia ka sekuestruar në cilësinë e provës materiale një shumë parash dhe dy celularë. Materialet i kaluan Prokurorisë, për veprime të mëtejshme.
