Një punonjëse sociale e një organizate joqeveritare ka ngritur alarmin për një rast shqetësues në zonën e Mbrostar Urë, në Fier.
Sipas saj, një grua e komunitetit rom jeton në kushte të vështira ekonomike, së bashku me vajzën e saj rreth 10 vjeçe, në një banesë të braktisur.
Punonjësja sociale pretendon se gruaja bashkëjeton me një person tjetër në atë banesë dhe se në prani të vajzës së mitur kryhen veprime të papërshtatshme. Ajo shprehet se ka kërkuar ndërhyrjen e institucioneve përkatëse, por sipas saj nuk është marrë asnjë masë konkrete.
Gazetarët u drejtuan në banesën e braktisur, ku pas rreth një ore mbërriti gruaja së bashku me vajzën. Ajo mohoi kategorikisht akuzat, duke deklaruar se kujdeset për të bijën dhe se nuk e detyron të lypë, por punon për të siguruar jetesën.
Situata u tensionua me mbërritjen e ish-bashkëjetuesit të saj. Mes dy palëve shpërtheu një debat i ashpër me akuza të ndërsjella. Burri pretendoi se gruaja kryen marrëdhënie intime në sy të vajzës së mitur, ndërsa gruaja e akuzoi atë se kishte përfituar para kur vajza e tyre më e madhe u martua në moshë të re.
Debati u zhvillua në prani të vajzës 10-vjeçare, ndërsa secila palë hodhi poshtë pretendimet e tjetrës. Gruaja deklaroi se ish-bashkëjetuesi e kishte përdorur më parë vajzën për të lypur në Tiranë, akuzë që ai e mohoi.
Për të kuptuar nëse institucionet kishin dijeni për rastin, Fiksi iu drejtua Njësisë Administrative Vajkan. Punonjësja sociale deklaroi se familja është e njohur për shërbimet sociale për shkak të gjendjes së rënduar ekonomike, por tha se nuk kishte informacione mbi pretendimet e ngritura në denoncim. Ajo garantoi se pas informacionit të ri do të kryhen verifikime të mëtejshme në terren.
Edhe inspektori i zonës deklaroi se nuk kishte dijeni për rastin, por u angazhua të ndjekë situatën pas interesimit të Fiks Fare.
Ndërsa institucionet nisin verifikimet, pyetja që mbetet është një. Kur prindërit akuzojnë njëri-tjetrin dhe askush nuk merr përgjegjësi, kush kujdeset për fëmijën?/TCH
