Grupi parlamentar i Partisë Demokratike ka njoftuar se gjatë kësaj jave do të depozitojë në Kuvend mocionin për të dërguar në Gjykatën Kushtetuese mandatin e deputetit të Partisë Socialiste, Vullnet Sina.
Sipas demokratëve, deputeti Sina ka përfituar të ardhura nga Buxheti i Shtetit, në vlerë disa milion lekë, përmes 9 kompanive të tij private, gjatë periudhës ku ushtron edhe mandatin e deputetit.
Më konkretisht, ai ka shkelur pikën 3 të nenit 70 në Kushtetut, ku thuhet qartë se: “Deputetët nuk mund të kryejnë asnjë veprimtari fitimprurëse që buron nga pasuria e shtetit ose e pushtetit vendor dhe as të fitojnë pasuri të këtyre”.
Pika pasardhëse e nenit 70 shprehet se “Për çdo shkelje të paragrafit 3 të këtij neni, me mocion të kryetarit të Kuvendit ose të një së dhjetës së anëtarëve të tij, Kuvendi vendos për dërgimin e çështjes në Gjykatën Kushtetuese, e cila konstaton papajtueshmërinë.”
PD ka njoftuar se mocioni, së bashku me të gjitha provat që kompanitë e tij kanë përfituar pagesa miliona lekshe nga Buxheti i Shtetit, do të dorëzohet gjatë kësaj jave zyrtarisht në Kuvend.
“Nga verifikimi i të dhënave të thesarit të shtetit, rezulton se deputeti Sina në kundërshtim flagrant me nenin 70, pika 3 e Kushtetutës, ka përfituar të ardhura nga Buxheti i Shtetit, në vlerë disa milion lekë, përmes 9 kompanive të tij private, gjatë periudhës ku ushtron edhe mandatin e deputetit.
Deputeti Vullnet Sina i shpallur si “deputet kampion” nga Edi Rama në Kongresin e fundit të Partisë Socialiste, rezulton se qënka kampion në përfitimin e parave publike në kundërshtim flagrant me Kushtetutën.
Mocioni, së bashku me të gjitha provat që kompanitë e tij kanë përfituar pagesa miliona lekshe, në mënyrë të vijueshme nga Buxheti i Shtetit, është duke u përgatitur dhe do të dorëzohet gjatë kësaj jave zyrtarisht në Kuvend.” – thuhet në njoftimin e PD-së.
Përfitimi i parave publike nga Vullnet Sina
Deputeti biznesmen Vullnet Sina është pronari me 100 % të kapitalit i kompanisë “BIGALB GROUP”, me të cilën menaxhon rreth 67 pika supermarketesh “Big Market”.
Në media janë publikuar dokumentet se Vullnet Sinaj ka përfituar para publike në kundërshtim me Kushtetutën, përmes kompanisë “Big Durrësi”, ku rezulton se ka marrë pagesa nga Shtëpia e të Moshuarve në Durrës, ndonëse në vlera të ulëta. Kompania Big Durrësi, e cila ka përfituar para publike, është 50 % në pronësi të kompanisë “BIGALB GROUP”.
Në një kohë që mban mandatin e deputetit, Vullnet Sinaj ka përfituar para publik edhe përmes kompanive “Big Lisus”, Big Peshkopia” apo “Big Roi” etj., të cilat janë pika të supermarketeve “Big Market”.
Ndërkohë, vlen për t’u theksuar fakti se kryeministri Edi Rama, gjatë fjalimit të mbajtur në Kongresin e PS-së, më 28 Korrik, Vullnet Sinën e konsideroi si deputetin për t’u marrë shembull nga socialistët, edhe pse siç duket ai ka shkelur Kushtetutën. Fjalët e Ramës e prekën emisionalisht deputetin socialist, aq sa nuk arriti dot t’i mbante lotët në Kongres.
“Vullnet Sina është njëri prej tyre, i ka në rregull punët e veta do thuhet nëper kafene por në fakt Vullneti rregull kishte edhe pa hyrë fare në skuadrën tonë, nuk është i vetmi kurrsesi, por ia zura emrin se para disa kohësh më tha se dëshiron ta mbyllë angazhimin e tij. Kurrë, asnjëherë nuk më ka shqetësuar për asgjë personale, por ama se ka patur problem të më shkruajë dhe pas mesnate duke u kthyer i lodhur nga dita e gjatë në një prej zonave më të varfra dhe më të vështira ku ka bërë atje sa një qeveri e tërë për njerëzit.” – tha Rama.
