Kandidati i koalicionit “Bashkë Fitojmë” ka reaguar për herë të parë pasi humbi zgjedhjet për Bashkinë e Himarës përballë kandidatit socialist Vangjel Tavo.
Gjikuria nuk pranon humbjen, teksa sipas tij, në këtë proces zgjedhor u panë metoda antidemokratike në të gjitha stadet e tyre. Më tej, ai ngre akuza se rezultati ishte produkt i transformimit të listës së zgjedhësve me qëllim përshtatjen e saj me interesat e kandidatit të mazhorancës.
Sipas tij, kjo ishte një betejë, e betejave të ardhshme që do të thirren për Himarën, teksa falenderon të gjithë ata që e ndihmuan në fushatën elektorale.
Reagimi i Petro Gjikurisë:
“Patëm një betejë të madhe. Një betejë e cila ishte vazhdim i shumë betejave të mëdha që kanë bërë himariotët, sidomos vitet e fundit të udhëhequr nga Fredi Beleri. Kjo betejë ishte pararojë e betejave të ardhshme që do të thirremi për vendin tonë.
Në këto zgjedhje pamë metoda antidemokratike në të gjitha stadet e tyre. Rezultati ishte produkt i transformimit të listës së zgjedhësve me qëllim përshtatjen e saj me interesat e kundërshtarëve tanë, duke i dhënë mundësinë një ushtrie partiake të merrte pjesë në zgjedhje dhe njëkohësisht, duke u mohuar këtë të drejtë mijëra qytetarëve të Himarës, si dhe duke përfshirë shtetin dhe parashtetin. Qëllimi ishte patja e një tjetër kryebashkiaku të dobët, i cili do t’u shërbejë interesave të Edi Ramës dhe partisë së tij.
Dëshiroj të falënderoj të gjithë ata që ndihmuan në këtë fushatë elektorale për garën e bukur dhe të ndershme që bëmë. Beteja për të nesërmen e Himarës vazhdon.”
