Ditën e sotme është ekstraduar nga Belgjika drejt vendit tonë Leonard Duka, ish-miku i të shumëkërkuarit të drejtësisë, Ervis Martinaj, që pas u kthyen dhe armiq të përbetuar të njëri-tjetrit.
Policia e Shtetit ka publikuar pamjet e momentit të ekstradimit nga Belgjika në Shqipëri, të shumëkërkuarit të drejtësisë Leonard Duka.
Ashtu siç duket edhe nga pamjet, ai është nën shoqërinë e forcave të shumta të policisë ndërsa forcat “RENEA” kanë blinduar të gjithë aeroportin në Rinas. Teksa është ekstraduar, Leonard Duka ishte i shpallur në kërkim lidhur me disa ngjarje kriminale, përfshi edhe dyshimet se ka ekzekutuar ish-policin Santiago Malkon, krahun e djathtë të Ervis Martinajt.
- Pamjet e ekstradimit të Leonard Dukës
- Kush është Leonard Duka?
Kujtojmë që Leonard Duka u arrestua në shkurt të 2023 në Belgjikë por qëndroi vetëm disa muaj në arrest, pasi ende nuk kishte marrëveshje për ekstradimin e tij.
Pas megaoperacionit policor, ‘Metamorfoza 2’ ku u zbardhën biseda në Sky Ecc të kokave të krimit në Shqipëri dhe u zbardhën disa vrasje dhe tentativa për vrasje, Duka u shpall sërish në kërkim dhe më 18 maj 2024 u vu në pranga në Belgjikë.
Personazhi i krimit “Leonard Duka” është shumë i njohur për drejtësinë, por edhe për publikun shqiptarë, i arrestuar arrestuar për herë të fundit në vitin 2019 nga një operacion për luftën kundër trafikut të drogës.
Teksa ka qenë në kërkim edhe për një atentat të dështuar më parë. Armiqësia e Dukës me Ervis Martinajn ka tërhequr më së shumti vëmendjen. Ervis Martinaj i cili ka qenë një nga bosët më të mëdhenj të lojërave të fatit në Shqipëri dhe njeri me influencë jo vetëm në botën e krimit, ishte kthyer ‘në gjahun’ më të shtrenjtë të rivalëve të tij, mes të cilëve është përmendur edhe ‘Klani Duka’. Por edhe vet Duka shpesh herë ka qenë objektiv eliminimi, teksa u ka shpëtuar disa atentateve i ndihmuar edhe nga lëvizjet e informacionet që merrte brenda strukturës së policisë.
Goditja e tij më e fortë që mundi të bënte ishte eliminimi i ish policit Santiago Malkos, i njohur dhe si një ndër njerëzit më të rëndësishëm të rivalit të tij, Ervis Martinajt. Më tej ai është përfolur edhe si i përfshirë më atentatin ndaj Fabian Gaxha, Erigers Mihasi, kushëriri i parë Brilant Martinaj dhe 2 të tjerë te atentati i Fushë Krujës, por në Milot disa ditë më vonë u vra Klisman Preçi dhe i plagosur rëndë krahu i djathtë i Martinajt, Ylli Brahimi, persona që janë sulmuar dhe eliminuar.
Duka u arrestua në Belgjikë më 18 maj 2024 pasi ndaj tij ishte firmosur një urdhër arresti në kuadër të megaoperacionit “Metamorfoza 2′ ku nga zbardhja e biseda në Sky ECC u zbuluan disa nga ngjarjet më të rënda kriminale në Shqipëri dhe u zbardhën disa vrasje dhe tentativa për vrasje dosjet e të cilave kishin zënë pluhur në vite.
38 vjeçari, Leonard Duka ishte i shpallur në kërkim ndërkombëtar nga ZQK Interpol Tirana, pasi Gjykata e Posaçme Kundër Korrupsionit dhe Krimit te Organizuar i ka caktuar masën e sigurisë “Arrest në burg”, për kryerjen e veprave penale “Vrasja me paramendim” dhe “Mbajtja pa leje dhe prodhimi i armëve, armëve shpërthyese dhe municionit luftarak”, të kryera në formën e grupit të strukturuar kriminal.
- Çfarë njofton policia?
“Interpol Tirana kryen ekstradimin nga Belgjika në Shqipëri, të shtetasit të shumëkërkuar L. D.
Drejtoria e Interpol Tirana, në bashkëpunim me Interpol Bruksel dhe me strukturat e specializuara të Policisë së Shtetit, realizoi ekstradimin drejt vendit tonë, të shtetasit L. D.
Shtetasi L. D. ishte shpallur në kërkim ndërkombëtar nga Interpol Tirana, pasi Gjykata e Posaçme Kundër Korrupsionit dhe Krimit të Organizuar i ka caktuar masën e sigurisë “Arrest në burg”, për veprat penale “Vrasja me dashje”, kryer në formën e veçantë të bashkëpunimit, “Mbajtja pa leje dhe prodhimi i armëve, armëve shpërthyese dhe municionit”, “Sigurimi i kushteve për vrasje”, “Grupi i strukturuar kriminal” dhe “Kryerja e veprave penale nga organizata kriminale dhe grupi i strukturuar kriminal”.
Nga hetimet e kryera ka rezultuar se shtetasi L. D. dhe 6 shtetas të tjerë janë autorët e dyshuar të ngjarjes së ndodhur në vitin 2019, në rrugën “Xhanfize Keko”, Tiranë, ku mbeti i vrarë me armë zjarri, shtetasi S. M.
Gjithashtu, shtetasi L. D., në bashkëpunim me shtetas të tjerë, ka planifikuar vrasjen e shtetasve Er. Ma., Er. Mi. dhe të anëtarëve të tjerë të grupit të tyre.
Drejtoria e Përgjithshme e Policisë së Shtetit falënderon Zyrën e Interpol Bruksel, për bashkëpunimin, dhe njësitë e angazhuara në realizimin me sukses të operacionit të ekstradimit”, thuhet në njoftiminin e policisë.
Lexo edhe:
Ekstradohet nga Belgjika Leonard Duka, armiku i betuar i Ervis Martinajt
