Me vendim të Këshillit të Ministrave është miratuar këtë të enjte rritja e pagave për punonjësit e bashkive. Lajmin e ka bërë me dije ministri për Pushtetin Vendor, Arbjan Mazniku, i cili tha në deklaratë për mediat se të gjitha pagat e pushtetit vendor do të unifikohen në të gjitha bashkitë.
Pas publikimit të të dhënave persona, pjesa më e madhe e tyre rezultonin “patronazhistë”, teksa kjo rritje pagash për punonjësit e bashkive vjen teksa kanë ngelur më pak se një vit nga zgjedhjet parlamentare të vitit 2025.
“Sot konkluduam një proces të rëndësishëm, i cili nisi që vitin që shkoi që ka të bëjë me pagat e pushtetit vendor. Është një reformë që merret me ristrukturimin e bashkive dhe stafeve të tyre në tre grupime të mëdhaja. E para një grupim që merret me planifikimin dhe monitorimin e politikave, një grupim që merret me funksionet që bashkia i kryen vetë dhe një grupim që bën ato funksione që bashkitë zgjedhin ti bëjnë vetë apo ti kontraktojnë.
Riklasifikuam nivelet e pagave, duke ndryshuar skemën. Nga një skemë e cila i ndante bashkitë në 5 grupime dhe në varësi të madhësisë së bashkive kishte edhe nivele të ndryshme pagash, në nivele pagash të unifikuar të të gjitha bashkive, pavarësisht madhësisë, duke dhënë mundësinë që një jurist, një arkitekt, ekonomistë etj merr një pagë të ngjashme në të gjitha bashkitë.
Elementi tjetër është rritja e pagave të të gjitha bashkive dhe rritja e minimume dhe maksimumeve të reja për të gjitha bashkitë në nivele të unifikuara”, u shpreh Mazniku.
