Ndini Tavani nuk do të marrë detyrën si prokurori i posaçëm i SPAK, edhe pse Këshilli i Lartë i Prokurorisë e zgjodhi në këtë post.
Skak është bërë komisioni i SPAK i cili nuk e ka “certifikuar” Ndini Tavanin si prokuror të këtij institucioni. Prokurori Ndini Tavani njihet si përfaqësuesi i akuzës që dërgoi në gjyq ish-ministrin Spiro Ksera, por edhe të tjerë personazhe gjatë hetimit financiar pas vrasjes së Artan Santos.
Ai njihet dhe si prokurori që hetoi pas tragjedisë së 21 janarit zyrtarë të lartë për zhdukjen e pamjeve filmike në Kryeministri, si dhe hetoi edhe mafien e tokave në qytetin e Vlorës duke prekur i pari një plagë për tjetërsimin e tokave në bregdet që u kopjua nga shumë prokurori të tjera.
Nuk dihen arsyet pse komisioni i SPAK nuk e ka “certifikuar” Ndini Tavanin si prokuror të posaçëm. Në vend të tij KLP-ja ka futur në listë prokurorin Bledar Maksuti, i renditur pas Ndini Tavanit kur u hap gara për 3 vendet vakante.
Po ashtu nesër KLP do të emërojë në SPAK prokuroren Anita Jella. Ndërkoqë që në mbledhjen e nesërme pritet të pezullohet nga detyra dhe kreu i Prokurorisë së Vlorës Aurel Zarka, i arrestuar mëngjesin e së hënës nga SPAK.
Rendi i ditës për seancën e KLP ditën e mërkurë:
Diskutimi / miratimi i projektaktit “Për emërimin në detyrë si prokuror në Prokurorinë e Posaçme Kundër Korrupsionit dhe Krimit të Organizuar të zonjës Anita Jella”;
Diskutimi / miratimi i projektaktit “Për moscaktimin në detyrë si prokuror në Prokurorinë e Posaçme Kundër Korrupsionit dhe Krimit të Organizuar të zotit Ndini Tavani”;
Diskutimi / miratimi i projektaktit “Për emërimin në detyrë si prokuror në Prokurorinë e Posaçme Kundër Korrupsionit dhe Krimit të Organizuar të zotit Bledar Maksuti”;
Diskutimi / miratimi i projektaktit “Për pezullimin nga detyra të prokurorit Aurel Zarka”.
