Grupi parlamentar i Partisë Socialiste është mbledhur ditën e sotme në Kryesinë e Kuvendit, një ditë pas Kongresit Zgjedhor, ku kryeministri Edi Rama propozoi ndryshimet në Qeveri dhe në parlament.
Mbledhja është drejtuar për herë të parë nga Niko Peleshi, i cili ka marrë votëbesimin e grupit, pas propozimit nga Rama, i cili vendosi ta shkarkonte nga posti i ministrit të Mbrojtjes dhe ta emëronte në vend të Çuçit, si kreun e grupit parlamentar të PS-së.
Në mbledhjen e sotme mësohet se kanë qenë i pranishëm dhe kryeministri Edi Rama, si dhe ministrat. Po ashtu, kanë marrë pjesë edhe tre ministrat e rinj të propozuar, edhe pse nuk janë dekretuar ende nga Presidenti Bajram Begaj dhe nuk janë miratuar në Kuvend.
Në foton e mësipërme janë ministri i ri i Financave Petrit Malaj, ministri i ri i Mbrojtjes Pirro Vëngu dhe ministri i ri i Brendshëm, Ervin Hoxha, teksa dalin nga Kryesia e Kuvendit pas mbledhjes. Malaj është parë në shoqërinë e shefes së tij, Belinda Ballukut në momentin kur ka dalë nga Kryesia.
Të tre ministrat e rinj, Petrit Malaj, Ervin Hoxha dhe Pirro Vëngu aktualisht mbajnë poste drejtorësh në institucione në varësi të ministres së Infrastrukturë dhe Energjitikës, Belinda Ballukut. Ervin Hoxha mban postin e drejtorit të Përgjithshëm të Inspektoriatit Kombëtar të Mbrojtjes së Territorit, Petrit Malaj mban postin e kreut të Agjencisë Kombëtare të Burimeve Natyrore dhe Pirro Vëngu mban postin e kreu të Autoritetit Portual të Durrësit.
Në mbledhjen e sotme të grupit të PS-së është diskutuar për ndryshimet në Qeveri dhe në Kuvend, si dhe për përgatitjet për zgjedhjet parlamentare të vitit 2025.
Gjithashtu, deputetët e PS-së janë njoftuar në mbledhjen e grupit nga kryeministri Edi Rama se seanca për ndryshimet në Qeveri do të shtyhet për nesër për shkak se Presidenti i Republikës, Bajram Begaj ende nuk i ka dekretuar emërimet e ministrave të rinj.
Burime nga Presidenca bëjnë me dije se ndryshimet në qeveri janë në proces verifikimi, ndërsa kryeministri Edi Rama u ka kërkuar deputetëve që të rrinë në gatishmëri për çdo orë kur mund të thirren.
