Kadetët e Forcës së Sigurisë së Kosovës do të kushtëzohen që të shërbejnë në ushtri për 8 vite radhazi. Kjo është përcaktuar edhe në kontratat për shkollimin e tyre që për Ministrinë e Mbrojtjes ka një kosto financiare.
Në kuadër të kushteve dhe kritereve mbi të cilat bazohet dhe mundësohet financimi i shkollimit të kadetëve është edhe mesatarja e notës dhe kalueshmëria e lëndëve ushtarake.
Në rast se kadeti dështon të plotësojë këto kushte atëherë do të detyrohet që të kompensojë Ministrinë e Mbrojtjes për dëmin e shkaktuar e që në total do të përfshijë pagën mujore si kadet, pagesën e shkollimit, sigurimin e literaturës, akomodimin, ushqimin dhe uniformën zyrtare.
“Çdo shkollim i kadetëve ka kosto financiare, kohë të investuar në ta dhe sigurisht plan operacional që bazohet në kuadrot që presim t’i kemi brenda FSK-së me përfundimin e shkollimit të tyre, prandaj sigurisht se aplikimi në FSK nuk mund të shihet si trampolinë por si mundësi e artë për t’u ngritur profesionalisht gjersa i përkushtohesh shërbimit në mbrojtje të atdheut”.
Gjatë vitit 2023, 129 ushtarë e kishin braktisur vullnetarisht FSK-në, kryesisht për shkak të pagës së ulët. Këto të dhëna ishin dhënë nga ministri Ejup Maqedonci gjatë një raportimi në Kuvend por që kishte thënë se ky është një “trend global”.
Ministria e Mbrojtjes nuk tha specifikisht nëse ky kushtëzim është si masë për të parandaluar largimin e ushtarëve në të ardhmen por shtoi se kjo aplikohet në shumë vende që janë pjesë e NATO-s.
“Politikat tona të kritereve dhe kushteve të shkollimit, studimeve dhe rekrutimit në FSK ndryshojnë varësisht nga lëvizja e tregut të punës dhe ndikimin e shumë faktorëve të tjerë duke pasë parasysh edhe faktorin demografik. Në hap me ndryshimet e rrethanave, ne bëjmë edhe plotësim-ndryshimin e politikave tona të brendshme në kriteret dhe kushtet e shkollimit, studimeve dhe rekrutimit në FSK dhe standardeve të paraparë në aktet ligjore dhe nënligjore”.
Kushtëzimi do të vlejë edhe për kadetët të cilët do të shkollohen jashtë Kosovës me ndryshimin që obligimi për të shërbyer në FSK do të jetë 6.4 vite, ndërsa ndëshkimi financiar do të jetë i njëjtë.
