Një shqiptar është arrestuar nga policia greke në pikën doganore të Kakavijës, pasi ishte shpallur në kërkim nga drejtësia e vendit fqinj.
Mediat greke raportojnë se në pranga është vënë 39-vjeçari Kreshnik Brakaj nga Novosela e Vlorës, i cili është ndaluar mesditën e djeshme.
Sipas policisë greke ai rezulton i dënuar me 7 vjet heqje lirie dhe 3 mijë euro gjobë, nga Gjykata 5-anëtarëshe e Apelit të Greqisë Qëndrore-Perëndimore. Ky dënim i është dhënë në 4 qershor 2015 për “shkelje të ligjit mbi narkotikët”.
Shqiptari është ndaluar gjatë verifikimit të pasaportës së tij, ndërkohë që dokumentacioni do t’i kalojë Prokurorisë së Janinës.
