Banorët e fshatit Piskovë, vetëm 8 kilometra larg Përmetit kanë tre vite që protestojnë kundër landfillit të mbetjeve urbane, i cili ndodhet shumë afër parkut të mbrojtur të Hotovës.
Ndërsa ky landfill e ka mbaruar kontratën, është ndërtuar mbi një burim uji me të cilin furnizohen banorët.
Kryetari i fshatit Piskova tha për emisionin “Fol” se në fillim iu thanë se do të bëhej një gropë kudo hidheshin plehrat dhe asokohe u mblodhën si komunitet dhe patën një takim me kryetaren Alma Hoxha.
“Na thanë do bëhet bëhen me shtresa mbrojtëse nga toka, nuk do ketë kontakt me dheun. Plehrat janë kontakt me ujin e pijshëm. Plehrat ndodhen mes dy parqeve kombëtare Bredhi i Hotovës dhe lumit Vjosë. Fshati ka afro 300 banorë. Kur u gërmua dhe pati kundërshti, këta nuk punonin dot më se filloi uji, buronte. Pastaj e ngjeshën prapë, e mbuluan.
E çuam çështjen në gjykatë, vendimin e dhanë fshehurazi në Gjykatën Administrative. Nuk është bërë as dëgjesë publike. Erdhi kryetarja e bashkisë bëri një takim provizor në njësinë administrative. As leje mjedisore nuk është marrë. Projekti nuk është zbatuar siç duhet, do hidhen plehrat do ngjeshën me rul thoshin, ato janë provizore, do mbillen pemë dhe nuk do hidhen më. Në fillim u thanë vetëm 8 muaj do hidhen, jo më. U bënë tre vjet dhe duket se nuk do hiqen më. Kryebashkiakja premtoi se do flasim së shpejti. I vunë flakën që të lirohej vendi. Pse nuk i shtruan me rul? Kërkoj ta ngre fjalën time dhe në parlament, ta mbyllim gropën e vdekjes.
Nëse një nga fëmijët del me sëmundje të keqe, kush është përgjegjësi kryesor? Se në vapë këto grimca shpërbëhen në ajër. Ujin e çezmës nuk e konsumojmë, kontaminohet. Lumica është ushqyesi kryesor i burimit ku merr ujë fshati, kjo është një politikë vrastare. Kumbaro e firmosi kur u bë ministre. Kjo u bë që kur vajti ajo ministre. Ne nuk na është treguar projekti. Jemi në rrezik për epidemi. Përjetuam katër ditë tym kur iu vu zjarri plehrave, në mëngjes ishte më keq. Peticionin me firmat do e çojmë në SPAK që ta mbyllim këtë çështje. Dua ta ngre çështjen në parlament. Nëse ata nuk reagojnë fjalën e fundit ta ketë SPAK-u. I bëj thirrje kryeministrit, të vij të bëjmë një takim në komunitet. Do më pëlqente të vinte ta shikonte situatën nga afër. Ta dëgjoj dhe e mirëpres. Nëse nuk më jep asnjë instancë kryesore përgjigje, do e kërkoj në parlament, në SPAK e të gjitha.
Unë atë vulë do e dorëzojë se nuk mund të vazhdoj me këtë grup njerëzish që janë të strukturuar. Se nuk mund të bëhem palë me ata njerëz. E dinë shumë mirë një pjesë të instancave që heshtin, se ne kemi të drejtë. Ajo zonë është turistike. I bëj thirrje kryeministrit a e shtron dot atë rrugë të zhvillohet? Vëllezërit Frashri dhanë çdo gjë, pse tremben këta që të ngrenë djepin e dijes.”
Një banor ngriti shqetësim për mungesë transparence ndërsa akuzoi deputeten Mirela Kumbaro se i është shmangur përgjegjësisë dhe se shkon vetëm për propagandë.
“Vjen vetëm për të shpërndarë karta anëtarësie. Është hyrje e parkut kombëtar. Këtu duhet të ishte e shteuar kjo rrugë, duhet të kishte zhvillim tjetër ekonomik kjo zonë. Kjo zonë përmbytet në dimër, plehrat janë në shtratin e lumit. Këtu kalojnë shumë turistë. Vijnë nga gjithë Shqipëria për pelegrinazh në teqenë e Ali Postivanit. Rrugën e mirëmban babai i teqesë. Këtu shteti ka 30 vjet që ka vdekur, të majtë e të djathtë komplet, kanë një gjak.”
Një tjetër banore u shpreh se para pak ditësh iu vunë zjarrin plehrave duke krijuar asifiksi dhe tym të dendur në zonë.
“Kam frikë të pimë ujin nga çezma. Sa herë e kemi ngritur si shqetësim nuk e vë veshin asnjë njeri, vetëm të marrin paranë. Pse nuk vijnë ata të komunës, vetëm që të marrin paranë? Nuk na zgjidhin asnjë gjë. Dita kur filloi tymi u zgjova në 2 të natës. Zumë dyer e dritare po prapë tymi kishte hyrë brenda.”
